Հուլիսի 11-ին և 12-ին Միացյալ Նահանգների և Իրանի զինված ուժերը հրթիռային և անօդաչու թռչող սարքերի նոր փոխադարձ հարվածներ են իրականացրել: Լարվածության ֆոնին իրանական կողմը հայտարարել է Հորմուզի նեղուցը կրկին փակելու մասին: Այս մասին հայտնում է Reuters-ը:
Ըստ ԱՄՆ Կենտրոնական հրամանատարության՝ միայն երեք օրում ամերիկյան ուժերը հարվածել են իրանական ավելի քան 300 ռազմական թիրախների, որոնցից 140-ը՝ հուլիսի 11-ին: ԱՄՆ նախագահ Դոնալդ Թրամփը Reuters-ին տված կարճ հարցազրույցում, մեկնաբանելով հարվածները, ընդգծել է. «Մենք նրանց ջախջախում ենք»: Թրամփը նաև հասկացրել է, որ հրադադարն ավարտված է համարում, թեև դուռը բաց է թողնում հետագա բանակցությունների համար:
Նահանգների գործողություններին ի պատասխան՝ Իրանը հարվածներ է հասցրել Պարսից ծոցի արաբական երկրներին: Իրանական հարվածների թիրախում են հայտնվել Կատարը, Արաբական Միացյալ Էմիրությունները, Բահրեյնը, Հորդանանը, Քուվեյթն ու Օմանը: Բացի այդ, հուլիսի 11-ին իրանական կողմը նախազգուշական կրակով Հորմուզի նեղուցով երթևեկող նավ է կանգնեցրել, իսկ հաջորդ օրը թիրախավորել մեկ այլ նավ: Միջադեպերից հետո Թեհրանը հայտարարել է, որ Հորմուզի նեղուցը փակ է նավագնացության համար:
Իրանի կողմից ստեղծված «Պարսից ծոցի նեղուցի հարցերով վարչությունը» ընդգծել է, որ նեղուցով անցումն այս պահին հնարավոր չէ «ԱՄՆ զինուժի ապօրինի տեղաշարժերի պատճառով», և նոր թույլտվություններ կտրվեն միայն կայունության վերականգնումից հետո: Միացյալ Նահանգները, սակայն, հայտարարում է, որ իր ուժերը դիրքավորված են նավագնացության ազատությունն ապահովելու համար և հերքում է, թե Իրանը վերահսկում է նեղուցը՝ նշելով, որ նավերի երթևեկությունը շարունակվում է այլընտրանքային՝ Օմանին մոտ գտնվող հարավային ընդլայնված երթուղով:
Լարվածության առնչությամբ Իրանի գլխավոր բանակցող Մոհամմադ Բաղեր Ղալիբաֆը X-ի իր միկրոբլոգում գրել է. «Միակողմանի գործարքների դարաշրջանն ԱՎԱՐՏՎԱԾ Է: Մենք ձեզ զգուշացրել էինք՝ պահեք ձեր խոսքը կամ վճարեք գինը»:
Իրանի արտաքին գործերի նախարարությունը նույնպես հանդես է եկել հայտարարությամբ՝ խստորեն դատապարտելով ԱՄՆ հարվածները: Իրանի արտաքին քաղաքական գերատեսչությունը շեշտել է, որ պատերազմի դադարեցման հուշագրի ստորագրումից ընդամենը 25 օր անց Վաշինգտոնը խախտել է դրա գրեթե բոլոր կետերը՝ հարվածելով Իրանի տրանսպորտային ենթակառուցվածքներին, ձկնորսական ու բեռնատար նավերին և այլ օբյեկտների:
Հայտարարության մեջ Թեհրանը նախազգուշացում է հղել Պարսից ծոցի հարավային ափին գտնվող հարևան պետություններին՝ ընդգծելով. «Ամերիկյան ահաբեկչական բանակը, Իրանի դեմ ռազմական ագրեսիա նախապատրաստելու համար օգտագործելով Պարսից ծոցի հարավային ափի երկրների տարածքն ու հնարավորությունները, այդ պետություններն ակնհայտորեն վերածել է ընդդեմ իրանական ժողովրդի մղվող անօրինական պատերազմի թատերաբեմի։ Հարևան երկրները, միջազգային իրավունքի համաձայն, պարտավոր են թույլ չտալ ագրեսոր կողմերին օգտագործել իրենց տարածքը: Իրանի դեմ հարձակումների ցանկացած աղբյուր և մեկնարկային կետ դառնալու է Իրանի զինված ուժերի օրինական պաշտպանական հարվածների թիրախը»։
Հետևեք մեզ տելեգրամում
