Համաշխարհային շուկայում նավթի գներն ավելի քան 3%-ով աճել են այն բանից հետո, երբ ԱՄՆ-ի և Իրանի միջև հանգստյան օրերին իրականացված նոր հարվածները կրկին մտահոգություններ են առաջացրել Հորմուզի նեղուցով էներգակիրների փոխադրման անվտանգության վերաբերյալ։
«Brent» տեսակի նավթի գինը աճել է 2,67 դոլարով (3,51%)՝ հասնելով բարելի դիմաց 78,68 դոլարի։ Միաժամանակ ամերիկյան WTI տեսակի նավթի գինն աճել է 2,48 դոլարով (3,47%)՝ հասնելով 73,89 դոլարի։
«ANZ» բանկի վերլուծաբանների գնահատմամբ՝ անվտանգության հետ կապված մտահոգությունների պատճառով ծովային փոխադրումներ իրականացնող ընկերություններն ավելի զգուշավոր մոտեցում են ցուցաբերում, ինչի հետևանքով Հորմուզի նեղուցով նավերի տեղաշարժը դանդաղել է։
Նշենք, որ Իրանը կիրակի հայտարարել էր, որ կրկին փակել է Հորմուզի նեղուցը։ Իրանական կողմի տվյալներով՝ շաբաթավերջին թիրախավորվել են Պարսից ծոցի տարածաշրջանում տեղակայված ամերիկյան օբյեկտներ, իսկ Իսլամական հեղափոխության պահապանների կորպուսը երկուշաբթի հայտարարել է Քուվեյթում և Բահրեյնում ԱՄՆ ռազմաբազաների վրա հարվածներ հասցնելու մասին։
Հետևեք մեզ տելեգրամում
