Փարիզում Ուկրաինայի նախագահ Վոլոդիմիր Զելենսկու հետ համատեղ մամուլի ասուլիսի ժամանակ Ֆրանսիայի նախագահ Էմանուել Մակրոնը հայտարարել է, որ երկրի հակաօդային պաշտպանությունն ուժեղացնելու նպատակով Ուկրաինան կստանա նոր սերնդի SAMP/T զենիթահրթիռային համակարգերի առաջին խմբաքանակը: Այս մասին հայտնում է Deutsche Welle-ն:
Կողմերը նաև «ճանապարհային քարտեզ» են համաձայնեցրել, որով Կիևը 16 միավոր ֆրանսիական «Rafale» կործանիչներ ձեռք կբերի։ Ակնկալվում է, որ ինքնաթիռներն Ուկրաինայի օդային տարածքում առաջին թռիչքները կիրականացնեն 2028-2029 թվականներին։ Կիևին կփոխանցվեն նաև ռադարային համակարգեր։
Միևնույն ժամանակ, Ֆրանսիան իր պատմության մեջ առաջին անգամ Ուկրաինային է տրամադրել ֆրանսիական մի շարք սպառազինությունների արտոնագրված արտադրության լիցենզիա։ Դրա շնորհիվ Կիևը հնարավորություն կստանա սեփական տարածքում արտադրել «SCALP» թևավոր հրթիռներ, «AASM» դասի բարձր ճշգրտության կառավարվող ավիաբոմբեր և SAMP/T համակարգերի համար նախատեսված «Aster» հրթիռներ։
Աջակցության այս փաթեթին զուգահեռ դաշնակիցները պայմանավորվել են վարժանքներ անցկացնել Ուկրաինային սահմանակից երկրներում, որոնք կմեկնարկեն պատերազմի ավարտից հետո։
Հետևեք մեզ տելեգրամում
