Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Կրեմլը սխալ է համարում Ուկրաինայի հարցում Ադրբեջանի նախագահ Իլհամ Ալիևի որդեգրած դիրքորոշումը, սակայն այդ տարաձայնությունները չեն կարող ստվեր գցել երկու երկրների հարաբերությունների վրա։
Պեսկովի արձագանքը հաջորդել է նախօրեին Ալիևի արած այն հայտարարությանը, որով վերջինս, պատասխանելով ուկրաինացի լրագրողի հարցին, վերահաստատել էր Ադրբեջանի աջակցությունը Ուկրաինայի տարածքային ամբողջականությանն ու ինքնիշխանությանը։
Ռուսաստանի նախագահի խոսնակն ընդգծել է, որ Մոսկվան սերտ հարաբերություններ է պահպանում մի շարք պետությունների հետ, որոնք կիսում են Ուկրաինայի տարածքային ամբողջականության վերաբերյալ ադրբեջանական կողմի տեսակետը, թեև ռուսական կողմը կատեգորիկ համաձայն չէ դրա հետ։
Ըստ Պեսկովի՝ չնայած առկա տարաձայնություններին, Մոսկվան առաջնորդվում է պրագմատիկ մոտեցմամբ և թույլ չի տա, որ այդ հարցը բացասաբար անդրադառնա երկկողմ կապերի վրա։ Նա հավելել է, որ ռուսական կողմը շարունակելու է հետևողականորեն և հիմնավորված կերպով իր դիրքորոշումը պարզաբանել ադրբեջանցի գործընկերներին։
Հետևեք մեզ տելեգրամում
