ԱՄՆ նախագահ Դոնալդ Թրամփը հայտարարել է, որ Վաշինգտոնը բանակցություններ է վարել Թեհրանի հետ և իրանական կողմին հորդորել քննարկումների միջոցով վերջ տալ հակամարտությանը։ «Fox News» հեռուստաալիքին տված հարցազրույցում Թրամփը նախազգուշացրել է, որ համաձայնության չգալու դեպքում ամերիկյան զինուժի գործողություններն էլ ավելի կսաստկանան:
«Հաջորդ շաբաթ նրանց համար իրավիճակն իսկապես կվատթարանա, քանի որ հերթը հասնելու է էլեկտրակայաններին ու կամուրջներին։ Մենք պատրաստվում ենք շարքից հանել դրանք, եթե նրանք չնստեն բանակցությունների սեղանի շուրջ»,- հավելել է Սպիտակ տան ղեկավարը՝ կրկնելով հակամարտության սրման վերաբերյալ նախկինում արված իր սպառնալիքները։
Պատասխանելով այն հարցին, թե որքան կտևեն ամերիկյան հարձակումները, Թրամփը շեշտել է, որ դրանք կշարունակվեն այնքան ժամանակ, մինչև ինքը չհայտարարի, որ դա բավական է։
Թեհրանն իր հերթին, արձագանքելով Թրամփի հայտարարություններին, հերքել է, որ ամերիկյան կողմի հետ բանակցություններ են անցկացրել: ԻԻՀ փոխարտգործնախարար Քազեմ Ղարիբաբադին ընդգծել է, որ վերջին մեկ ամսում Իրանն ԱՄՆ-ի հետ քննարկումներ չի ունեցել:
Նշենք, որ ամերիկյան զինված ուժերն արդեն չորրորդ գիշերն անընդմեջ հարվածներ են հասցնում Իրանին: Հուլիսի 14-ից նրանք վերականգնել են նաև իրանական նավահանգիստների ծովային շրջափակումը:
Հետևեք մեզ տելեգրամում
