Հայաստանի և Ադրբեջանի միջև դե ֆակտո խաղաղություն է արդեն հաստատվել։ Այդ մասին Մոսկվայում Ռուսաստանի արտգործնախարար Սերգեյ Լավրովի հետ համատեղ ասուլիսի ժամանակ հայտարարել է Ադրբեջանի արտգործնախարար Ջեյհուն Բայրամովը։
Նրա խոսքով՝ «Ադրբեջանի կողմից առաջ քաշված խաղաղ նախաձեռնությունները, այդ թվում՝ վստահության ամրապնդմանն ուղղված քայլերը, զգալիորեն արագացրել են Հայաստանի և Ադրբեջանի միջև հարաբերությունների կարգավորման գործընթացը»։
Նշենք, որ Բայրամովը հուլիսի 16-17-ը պաշտոնական այցով գտնվում է Մոսկվայում։ Հուլիսի 17-ին կայացած բանակցությունների ընթացքում Ադրբեջանի և Ռուսաստանի արտգործնախարարները քննարկել են երկկողմ համագործակցության ընթացքն ու հեռանկարները, ինչպես նաև կարծիքներ փոխանակել տարածաշրջանային և միջազգային օրակարգին վերաբերող հարցերի շուրջ։
Հանդիպումից հետո Սերգեյ Լավրովը հայտարարել է, որ Մոսկվան և Բաքուն շարունակում են շարժվել դաշնակցային փոխգործակցության մասին Մոսկվայի հռչակագրով նախատեսված երկկողմ հարաբերությունների ամբողջ ներուժի իրացման ուղղությամբ։
Իր հերթին Բայրամովը նշել է, որ, չնայած համաշխարհային տնտեսության առջև ծառացած մարտահրավերներին, Ռուսաստանի և Ադրբեջանի տնտեսական համագործակցությունը շարունակում է դրական զարգացում արձանագրել։ Նա նաև ընդգծել է երկու երկրների միջև հումանիտար համագործակցության կարևորությունը։
Հետևեք մեզ տելեգրամում
