Հարավային Կորեայի արտաքին գործերի նախարարությունը Մերձավոր Արևելքում լարվածության աճի պայմաններում կարճաժամկետ այցով տարածաշրջանում գտնվող երկրի քաղաքացիներին կոչ է արել հնարավորինս շուտ հեռանալ այնտեղից։ Այս մասին հայտնել է հարավկորեական «Yonhap» լրատվական գործակալությունը։
Գերատեսչությունը համապատասխան հանձնարարականը հրապարակել է Իրանում, Իսրայելում և տարածաշրջանի այլ երկրներում հավատարմագրված 17 դիվանագիտական ներկայացուցչությունների մասնակցությամբ անցկացված խորհրդակցությունից հետո, որի ընթացքում քննարկվել են Հարավային Կորեայի քաղաքացիների և նավերի անվտանգության հարցերը։
Նախարարությունում նշել են, որ Մերձավոր Արևելքում իրավիճակը շարունակում է սրվել՝ ԱՄՆ-ի և Իրանի միջև ավելի քան մեկ շաբաթ շարունակվող ռազմական բախումների, ինչպես նաև Հորմուզի նեղուցի մեծ մասի արգելափակման պատճառով։
Հարավային Կորեայի արտաքին գործերի նախարարի երկրորդ տեղակալ Կիմ Ջինան հիշեցրել է, որ մարտից ի վեր Մերձավոր Արևելքի երկրների մեծ մասի համար գործում է ճանապարհորդության վտանգի երրորդ մակարդակը, որը քաղաքացիներին խորհուրդ է տալիս լքել այդ երկրները, եթե այնտեղ մնալու խիստ անհրաժեշտություն չկա։
Նա նաև կոչ է արել առավել զգոն լինել Կարմիր ծովում գործող հարավկորեական նավերի անվտանգության հարցում՝ հաշվի առնելով Եմենի հութիների և Սաուդյան Արաբիայի միջև վերջին ռազմական լարվածությունը։
Հվ․ Կորեայի արտաքին գործերի նախարարության տվյալներով՝ Մերձավոր Արևելքում գործող հարավկորեական դիվանագիտական ներկայացուցչությունները կշարունակեն ուշադիր հետևել իրավիճակին և ձեռնարկել անհրաժեշտ միջոցներ՝ երկրի քաղաքացիների անվտանգությունն ապահովելու համար։
Հետևեք մեզ տելեգրամում
