Ուժեղ անձրևից Թբիլիսիի մի շարք փողոցներ գիշերը հեղեղվել են, ինչի հետևանքով քաղաքում երթևեկությունը դժվարացել է։ Սոցցանցերում տարածվում են հեղեղված փողոցների և ջրի մեջ մնացած մեքենաների տեսանյութեր։
քաղաքի որոշ հատվածներում վարորդները ստիպված են եղել ձեռքով դուրս բերել ջրի մեջ մնացած մեքենաները։ Ջրի ներթափանցում է գրանցվել նաև Թբիլիսիի երկաթուղային կայարանի շենքում։ Թբիլիսիի քաղաքապետ Կախա Կալաձեի խոսքով՝ արտակարգ իրավիճակների ծառայություններն ամբողջ գիշեր աշխատել են, և թեժ գծին ստացված բոլոր ահազանգերին արձագանք է տրվել։
Վրաստանի Շրջակա միջավայրի ազգային գործակալությունն էլ ավելի վաղ նախազգուշացրել էր, որ հուլիսի 20-ի գիշերից մինչև հուլիսի 21-ի առավոտը Թբիլիսիում և հարակից տարածքներում սպասվում են անձրևներ, առանձին վայրերում՝ ուժեղ ամպրոպ, կարկուտ և քամու ուժգնացում։ Գործակալության գնահատմամբ՝ առատ տեղումները կարող են առաջացնել վարարումներ փոքր գետերում, ինչպես նաև սողանքներ և սելավներ։ Կախա Կալաձեն, անդրադառնալով հեղեղումների շուրջ քննադատություններին, հայտարարել է, որ նման եղանակային երևույթներ տեղի են ունենում նաև այլ երկրներում և ընդդիմությանն ու իշխանության քննադատներին կոչ է արել անձրևները չօգտագործել «քաղաքական շահարկումների» համար։
Հետևեք մեզ տելեգրամում
