Եվրամիությունը հաստատել է Ռուսաստանի դեմ 21-րդ պատժամիջոցների փաթեթը, որը ներառում է ընդհանուր առմամբ 218 ֆիզիկական և իրավաբանական անձանց ու կազմակերպությունների։ Այս մասին X սոցիալական հարթակում հայտնել է ԵՄ արտաքին քաղաքականության և անվտանգության հարցերով ներկայացուցիչ Կայա Կալլասը։
«Սա վերջին չորս տարվա ընթացքում մեր ամենախոշոր պատժամիջոցների փաթեթն է՝ ընդհանուր առմամբ 218 կետով», – գրել է Կալլասը։
Նրա խոսքով՝ նոր սահմանափակումները թիրախավորում են Ռուսաստանի ֆինանսական համակարգը, ռազմարդյունաբերական համալիրը և էներգետիկ ոլորտը։ Պատժամիջոցների ցանկում ընդգրկվել են ռազմարդյունաբերական համալիրի ավելի քան 50 ձեռնարկություններ, այդ թվում՝ ռուսական հեռահար անօդաչու թռչող սարքերի արտադրության առանցքային ընկերություններ։
Բացի այդ, սահմանափակումները տարածվել են ավելի քան 100 ռուսական բանկերի և կրիպտոարժույթի բորսաների օպերատորների, այսպես կոչված «ստվերային նավատորմի» ավելի քան 40 նավերի, ինչպես նաև Ռուսաստանի և Բելառուսի մի շարք նավթավերամշակման գործարանների նկատմամբ։
Կալլասը նշել է, որ Եվրամիությունը մտադիր չէ սահմանափակվել արդեն ընդունված պատժամիջոցներով։«Սա պատժամիջոցների քաղաքականության ավարտը չէ։ Մենք արդեն աշխատում ենք հաջորդ քայլերի ուղղությամբ», – հայտարարել է նա։
Հետևեք մեզ տելեգրամում
