2026 թվականի երկրորդ եռամսյակում Վրաստանում զբոսաշրջությունից ստացված եկամուտները նվազել են 3,8%-ով՝ կազմելով 1,1 միլիարդ դոլար: Այս մասին հայտնում է Newsgeorgia լրատվական կայքը:
Այս անկման հիմնական պատճառը Մերձավոր Արևելքի երկրներից, մասնավորապես՝ Իրանից և Սաուդյան Արաբիայից, ինչպես նաև Թուրքիայից զբոսաշրջիկների կտրուկ կրճատումն է: Հասույթի կորուստը մասամբ հնարավոր է եղել փոխհատուցել ԵՄ երկրներից, Ռուսաստանից, Ուկրաինայից և Ադրբեջանից եկած ճանապարհորդների ակտիվության հաշվին:
Վրաստանի Ազգային բանկի տվյալներով՝ մեկ ուղևորության ընթացքում ամենաշատը ծախսում են Իսրայելի քաղաքացիները (միջինում 1 519 դոլար): Նրանց հաջորդում են Սաուդյան Արաբիայի, Ուկրաինայի և ԵՄ երկրների զբոսաշրջիկները, որոնց ծախսերը մեկ անձի հաշվով տատանվում են 1 340-ից 1 470 դոլարի սահմաններում:
Ուշագրավ պատկեր է արձանագրվել Եվրոպայից և Ռուսաստանից ժամանած այցելուների ծախսերի համեմատության մեջ: Տարվա առաջին կեսին Վրաստան է այցելել ավելի քան 610 հազար ռուսաստանցի, որոնք ընդհանուր առմամբ ծախսել են 307 միլիոն դոլար, ինչը մեկ անձի հաշվով կազմում է միջինում 503 դոլար: Միևնույն ժամանակահատվածում Եվրոպական միությունից և Մեծ Բրիտանիայից ժամանել է կրկնակի պակաս մարդ՝ ընդամենը 249 հազար զբոսաշրջիկ, սակայն նրանց ծախսերը կազմել են ռեկորդային 336 միլիոն դոլար: Սա նշանակում է, որ մեկ եվրոպացի զբոսաշրջիկը Վրաստանում թողել է միջինում 2,7 անգամ ավելի շատ գումար, քան ռուսաստանցին:
Հետևեք մեզ տելեգրամում
