Տաթևի Մեծ անապատի տարածքում իրականացված պեղումների արդյունքում հաստ հողաշերտի տակից դուրս է բերվել համալիրի միջնադարյան աղբյուրը: Այս մասին հայտնում է Պատմամշակութային ժառանգության գիտահետազոտական կենտրոնը։
Ըստ հաղորդագրության՝ դեռևս 19-րդ դարում ազգագրագետ Երվանդ Լալայանը հիշատակել էր համալիրի տարածքում գտնվող աղբյուրի մասին, սակայն դրա հստակ տեղադրությունը մնում էր անհայտ:
«Ճարտարապետ Մուրադ Հասրաթյանի նկարագրության հիման վրա իրականացված (2026 թ.) մեր (ՊԺԳՀԿ արշավախմբի ղեկ.՝ Արման Նալբանդյան) պեղումների արդյունքում հողաշերտի տակից բացվեց Տաթևի Մեծ անապատի միջնադարյան աղբյուրը։ Վերջինս բավականին հետաքրքիր կառույց է՝ թե՛ իր ինժեներական, թե՛ գեղարվեստական լուծումներով։ Աղբյուրն ամբողջությամբ բացվել է, և այժմ այն հասանելի ու տեսանելի է Տաթևի Մեծ անապատի այցելուների համար»,-նշել են կենտրոնից։
Հետևեք մեզ տելեգրամում
