ՀՀ տարածքային կառավարման և ենթակառուցվածքների նախարար Դավիթ Խուդաթյանն ընդունել է Իրանի Իսլամական Հանրապետության արտաքին գործերի նախարարի տեղակալ Համիդ Ղանբարիին։ Այս մասին հայտնում են նախարարությունից:
Նախարարը շնորհակալություն է հայտնել օրերս Իրան կատարած այցի ընթացքում ցուցաբերված ջերմ ընդունելության համար: Դավիթ Խուդաթյանն ընդգծել է, որ Իրանում քննարկված հարցերի լայն շրջանակն ու ձեռք բերված պայմանավորվածությունները թույլ կտան առաջիկայում էլ ավելի խորացնել երկու երկրների միջև առկա բարձր մակարդակի փոխգործակցությունը։
Զրուցակիցները քննարկել են էներգետիկ, տրանսպորտային և ճանապարհաշինության ոլորտներին վերաբերող մի շարք հարցեր: ՀՀ ՏԿԵ նախարարը հատուկ նշել է, որ Հայաստանի շինարարական աշխատանքներում իրանական ընկերությունների ներգրավվածության ծավալը երբեք այսքան մեծ չի եղել, ինչը միայն ողջունելի է։
Անդրադարձ է կատարվել նաև Հայաստան-Իրան 400 կՎ էլեկտրահաղորդման երրորդ գծի շինարարության ընթացքին՝ երկուստեք ընդգծելով նախագծի ռազմավարական նշանակությունը երկկողմ հարաբերություններում:
Հետևեք մեզ տելեգրամում
