Միջուկային էներգիայի միջազգային գործակալությունը (ՄԱԳԱՏԷ) նախատեսում է հեռացնել Սիրիայում գտնվող գաղտնի օբյեկտում պահվող միջուկային նյութը։ Այս մասին հայտնում է «Axios»-ը՝ հղում անելով Իսրայելի և ԱՄՆ-ի պաշտոնյաներին։
Ըստ հրապարակման՝ այդ գործընթացի շուրջ ԱՄՆ նախագահ Դոնալդ Թրամփի վարչակազմը պայմանավորվածություններ է ձեռք բերել Սիրիայի և Իսրայելի հետ։ ՄԱԳԱՏԷ-ն ավելի վաղ հայտնել էր, որ Սիրիայում՝ նախկին իշխանությունների օրոք գործող միջուկային ծրագրի հետ կապված օբյեկտներից մեկում, հայտնաբերվել են ուրանի հետքեր։
Սիրիայի նախկին նախագահ Բաշար Ասադի իշխանության տարիներին երկիրը, ըստ միջազգային գնահատականների, ունեցել է չհայտարարված միջուկային ծրագիր։ Դրա մաս է համարվել Դեյր Զորի շրջանում կառուցված չհայտարարված միջուկային ռեակտորը, որի կառուցմանը, ըստ տեղեկությունների, մասնակցել է Հյուսիսային Կորեան։ Օբյեկտի գոյության մասին հայտնի է դարձել 2007 թվականին, երբ Իսրայելը ավիահարվածներով ոչնչացրել է այն։ Հետագայում տարածքը քանդվել է, իսկ Սիրիայի իշխանությունները ամբողջությամբ չպատասխանեցին ՄԱԳԱՏԷ-ի հարցերին օբյեկտի վերաբերյալ։
Սիրիայի ներկայիս իշխանությունները, նախագահ Ահմադ ալ-Շարաայի գլխավորությամբ, ՄԱԳԱՏԷ-ի տեսուչներին թույլ են տվել մուտք գործել նախկինում կասկածելի համարվող միջուկային օբյեկտներ։
«Axios»-ի փոխանցմամբ՝ միջուկային նյութի հեռացումը նախատեսվում է իրականացնել ՄԱԳԱՏԷ-ի վերահսկողությամբ։
Հետևեք մեզ տելեգրամում
