Թուրքիայի Ազգային կրթության նախարարության տեսուչները ստուգումներ են անցկացրել Ստամբուլի հայկական դպրոցներում և դպրոցների տնօրեններին տեղեկացրել, որ դպրոցներն այլևս չեն կարող Հայաստանից եկած «հյուր աշակերտներ» ընդունել, իսկ այնտեղ սովորող ՀՀ քաղաքացի երեխաները պետք է կրթությունը շարունակեն պետական դպրոցներում։ Այս մասին հայտնում է «Ակոս» շաբաթաթերթը։
Պարբերականի տեղեկություններով՝ տեսուչները նախորդ շաբաթ ստուգումներ են սկսել հայկական դպրոցներում՝ իրենց հետ ունենալով Հայաստանից եկած աշակերտների անունները ընդգրկող ցուցակներ։ Նրանք հետաքրքրվել են նաև նախորդ տարիներին սովորած աշակերտների հետագա ճակատագրով։
Թուրքիայում գործող «Մարդու իրավունքների և ճնշվածների հետ համերաշխության միությունը» (MAZLUMDER) քննադատել է հնարավոր սահմանափակումը՝ նշելով, որ տարիներ շարունակ գործող կարգավորումից հրաժարվելը և երեխաների կրթական գործընթացի ընդհատումը կարող է խախտել նրանց կրթության իրավունքը։ Կազմակերպությունը իշխանություններին կոչ է արել հարցը կարգավորել այնպես, որ որևէ երեխա չտուժի։
«Ակոս»-ն ուշադրություն է հրավիրում նաև այն հանգամանքի վրա, որ սահմանափակման մասին տեղեկությունները հայտնվում են Թուրքիա-Հայաստան հարաբերությունների կարգավորման գործընթացի պայմաններում՝ հարց բարձրացնելով, թե ինչու է շուրջ 14 տարի գործող կարգավորումը վերանայվում հենց այս փուլում։
Նշենք, որ Ստամբուլի հայկական դպրոցները ՀՀ քաղաքացի երեխաներին ընդունում են 2012 թվականից՝ Թուրքիայի «Մասնավոր ուսումնական հաստատությունների կանոնակարգի» հիման վրա, որով օտարերկրյա քաղաքացիներին թույլատրվում է սովորել «հյուր աշակերտի» կարգավիճակով՝ առանց դիպլոմ ստանալու իրավունքի։ Այս կարգավորումը հայկական դպրոցներում կիրառվում է շուրջ 14 տարի։
Հետևեք մեզ տելեգրամում
