Իրանի և Օմանի միջև ձեռք է բերվել նախնական համաձայնություն՝ Հորմուզի նեղուցով համատեղ ժամանակավոր ծովային միջանցք ստեղծելու և նեղուցը ականներից մաքրելու համատեղ ծրագիր իրականացնելու վերաբերյալ։ Համատեղ մամուլի հայտարարությունը հրապարակվել է Օմանի արտգործնախարար Սեյեդ Բադր բեն Համադ Ալ-Բուսաիդիի՝ Թեհրան կատարած աշխատանքային այցից և Իրանի արտաքին գործերի նախարար Սեյեդ Աբբաս Արաղչիի հետ բանակցություններից հետո։ Փոխանցում են իրանական ԶԼՄ-ները:
Հայտարարության համաձայն՝ կողմերը, հաշվի առնելով Հորմուզի նեղուցում վերջին պատերազմից և դրա հետևանքներից հետո ստեղծված իրավիճակը, քննարկել են փուլային շրջանակ, որը կարող է հիմք հանդիսանալ նավագնացության հարցի կարգավորման համար։ Առաջարկվող առաջին փուլը նախատեսում է Հորմուզի նեղուցով համատեղ ժամանակավոր ծովային միջանցքի ստեղծում, ինչպես նաև նեղուցը ականներից մաքրելու համատեղ ծրագրի իրականացում։
Միաժամանակ, կողմերի միջև տեխնիկական բանակցությունները կշարունակվեն՝ մշտական ծովային միջանցքի ստեղծման, նեղուցի ապագա կառավարման, տեղեկատվության փոխանակման, երթևեկության կառավարման և համապատասխան ծովային ու անվտանգային ծառայությունների մատուցման մեխանիզմների շուրջ համաձայնության հասնելու նպատակով։
Կողմերը նաև կարևորել են Պարսից ծոցի ջրերին սահմանակից տարածաշրջանի երկրների հետ համատեղ երկխոսությունների անցկացումը։ Իրանի և Օմանի համատեղ հայտարարության մեջ ընդգծվել է կիրառելի միջազգային իրավունքի պահպանման և ափամերձ երկրների ինքնիշխան իրավունքների հարգման անհրաժեշտությունը։
Իրանի փոխարտգործնախարար Քազեմ Ղարիբաբադին, անդրադառնալով ձեռք բերված պայմանավորվածությանը, ընդգծել է, որ նոր երթուղու ստեղծումը չի նշանակում Հորմուզի նեղուցի լիարժեք բացում։
Նրա խոսքով՝ առաջարկվող ժամանակավոր երթուղին «երկկողմանի երթևեկությամբ մայրուղու նման է» և նախատեսված է որպես ժամանակավոր լուծում։ Ղարիբաբադիի փոխանցմամբ՝ Իրանը և Օմանը պետք է առաջիկա 30-60 օրվա ընթացքում բանակցեն նոր մշտական երթուղու շուրջ, որը կփոխարինի ծովային երթևեկության նախկին նախագծին։
Իրանի փոխարտգործնախարարը նշել է, որ Պարսից ծոց մուտք գործող նավերի երթուղին անցնելու է Իրանի տարածքային ջրերով, իսկ ելքի երթուղին՝ Օմանի տարածքային ջրերով։ Միաժամանակ, ըստ նրա, երկու ուղղություններով էլ նավերը որոշ հատվածներում անցնելու են Իրանի ջրերով։
Ղարիբաբադին նաև հայտարարել է, որ Հորմուզի նեղուցի հարավային երթուղին փակվելու է, և այդ հարցը համաձայնեցված է կողմերի միջև։
Հետևեք մեզ տելեգրամում
