Չինաստանը պատրաստվում է պաշտպանել իր տնտեսական շահերը Վաշինգտոնի նոր պատժամիջոցներից: ԱԳՆ խոսնակ Լին Ցզյանը հայտարարել է, որ Պեկինն ապօրինի է համարում Իրանի և նրա հետ համագործակցող երկրների դեմ ԱՄՆ-ի միակողմանի պատժամիջոցները և իր իրավունքներն ու շահերը պաշտպանելու համար կձեռնարկի բոլոր անհրաժեշտ քայլերը: Փոխանցում է «BBC»-ն։
Հայտարարությունը հաջորդել է ԱՄՆ ֆինանսների նախարար Սքոթ Բեսենթի հայտարարությանը, ըստ որի՝ Վաշինգտոնը պատրաստվում է ընդլայնել Իրանի դեմ պատժամիջոցները։ Բեսենթը նախազգուշացրել է, որ Իրանի հետ ֆինանսական համագործակցություն իրականացնող երկրներն ու ընկերությունները կարող են մեկուսացվել։
Չինաստանը Իրանի նավթի խոշորագույն գնորդն է, թեև ԱՄՆ-ի կողմից Իրանի նավահանգիստների շրջափակման պայմաններում այդ առևտրի ծավալները նվազել են։ «Չինաստանի և Իրանի միջև համագործակցությունը միշտ իրականացվել է միջազգային իրավունքի շրջանակներում և չպետք է միջամտության կամ խափանման ենթարկվի», – նշել է Լին Ցզյանը։
Բեսենթը ԱՄՆ-ի նոր պատժամիջոցներն անվանել է Իրանի դեմ «երբևէ իրականացված ամենամեծ ֆինանսական հարձակումը»՝ ընդգծելով, որ Իրանի հետ կապերը չդադարեցնող բանկերն ու ընկերությունները նույնպես կարող են հայտնվել սահմանափակումների ներքո։
Նա չի առանձնացրել որևէ կոնկրետ երկիր, սակայն հայտարարել է, որ ԱՄՆ նախագահ Դոնալդ Թրամփը զանգահարելու է տարբեր երկրների ղեկավարներին՝ «կոնկրետ պահանջներով»՝ դադարեցնելու Իրանի իշխանությունների հետ փոխգործակցությունը։
Չինաստանի պատասխանը հնչում է ԱՄՆ նախագահ Դոնալդ Թրամփի և Չինաստանի նախագահ Սի Ծինփինի՝ հաջորդ ամիս նախատեսվող բանակցություններից առաջ։
Ըստ լրատվամիջոցի՝ Վաշինգտոնը հաշվի կառնի Պեկինի հնարավոր հակաքայլերը, քանի որ Չինաստանը համաշխարհային հազվագյուտ հողային մետաղների և այլ կարևոր հանքանյութերի վերամշակման հիմնական կենտրոնն է։ Դրանք առանցքային նշանակություն ունեն բարձր տեխնոլոգիական արտադրության համար։
Միաժամանակ Իրանի էկոնոմիկայի նախարար Ալի Մադանիզադեն հայտարարել է, որ Թեհրանը «լիովին պատրաստ է» ԱՄՆ-ի ընդլայնված պատժամիջոցներին։ Նրա խոսքով՝ Իրանի կառավարությունն ունի առաջիկա երկու տարվա համար նախատեսված ծրագիր՝ նման իրավիճակները կառավարելու համար։
ԱՄՆ-ը նոր պատժամիջոցների քաղաքականությունն անվանել է «Տնտեսական վտարանդիության գործողություն» և այն բնութագրել որպես Իրանի դեմ ուղղված «տնտեսական Դ-օր»։
Հետևեք մեզ տելեգրամում
