ԱՄՆ պետքարտուղար Մարկո Ռուբիոն վերջին օրերին մի շարք երկրների իր գործընկերներին հայտնել է, որ Վաշինգտոնն «առայժմ» չի պատրաստվում նոր հարվածներ հասցնել Իրանին և կենտրոնանում է այլ միջոցներով ճնշումն ուժեղացնելու վրա։ Այս մասին հայտնում է Axios-ը՝ հղում անելով իր աղբյուրներին։
Ռուբիոն իր գործընկերների հետ հեռախոսազրույցներում, ըստ աղբյուրների, ներկայացրել է Թրամփի վարչակազմի ներկայիս մոտեցումը, այն է՝ առայժմ խուսափել Իրանի դեմ ռազմական գործողություններից, ռազմածովային շրջափակման և նոր պատժամիջոցների միջոցով ուժեղացնել տնտեսական ճնշումը, Հորմուզի նեղուցով հնարավորինս մեծ ծավալով նավթ տեղափոխել համաշխարհային շուկաներ։
ԱՄՆ պաշտոնյաներից մեկի խոսքով՝ Ռուբիոն հստակեցրել է, որ Վաշինգտոնը չի նախատեսում վերադառնալ լայնածավալ ռազմական գործողությունների, սակայն չի բացառել հարվածների հնարավորությունը, եթե Իրանը առաջինը հարձակվի։
Մեկ այլ ամերիկացի պաշտոնյա նշել է, որ ներկայիս քաղաքականությունը, ամենայն հավանականությամբ, կշարունակվի առնվազն մինչև ԱՄՆ-ի միջանկյալ ընտրությունները։ Դրանից հետո Իրանի դեմ նոր ռազմարշավը կրկին կարող է հայտնվել օրակարգում։
ԱՄՆ պաշտոնյաների խոսքով՝ Հորմուզի նեղուցի մեծ մասի ականազերծումը և վերջին շաբաթներին նեղուցի հարավային հատվածով նավթատարների երթևեկության աճը զգալիորեն նվազեցրել են Իրանի ազդեցությունը համաշխարհային էներգետիկ շուկաների վրա։ ԱՄՆ պաշտոնյաներից մեկը հայտարարել է, որ Իրանը կորցրել է նեղուցի վերահսկողությունը, և այն այժմ վերահսկում է ԱՄՆ-ը։
Վաշինգտոնը նաև պնդում է, որ ռազմածովային շրջափակումը զրկում է Իրանին կարևոր եկամուտներից։ Ամերիկացի պաշտոնյաների տվյալներով՝ վերջին երկու շաբաթվա ընթացքում գրեթե ոչ մի նավթատար չի նկատվել Խարգ կղզու մոտ, որը Իրանի նավթի արտահանման հիմնական հանգույցներից է։
ԱՄՆ Պետդեպարտամենտի խոսնակ Թոմի Փիգոթը Axios-ին հայտնել է, որ Իրանի տնտեսությունը «ազատ անկման մեջ է», իսկ երկրի զինված ուժերը ծանր հարվածներ են ստացել։ Նրա խոսքով՝ Վաշինգտոնը փորձում է կտրել Իրանի իշխանությունների մնացած ֆինանսական աղբյուրները։
Փիգոթը նաև նշել է, որ ԱՄՆ նախագահ Դոնալդ Թրամփը հստակ հայտարարել է՝ Իրանը չպետք է միջուկային զենք ունենա, և Վաշինգտոնը կօգտագործի անհրաժեշտ միջոցներն այդ նպատակն ապահովելու համար։
Հետևեք մեզ տելեգրամում
