Հայաստանը Ռուսաստանի հետ հարաբերություններում անկեղծ է և որևէ քայլ չի անում դրանք վատթարացնելու ուղղությամբ։ Այս մասին ԱԺ-ում լրագրողների հետ ճեպազրույցում հայտարարել է ԱԺ նախագահ Ռուբեն Ռուբինյանը՝ արձագանքելով ՌԴ Պետդումայի նախագահ Վյաչեսլավ Վոլոդինի հայտարարությանը։
«Մենք չափազանց անկեղծ ենք Ռուսաստանի հետ և միշտ էլ անկեղծ ենք եղել։ Մենք չէ, որ ինչ-որ բան ենք անում Ռուսաստանի Դաշնության հետ հարաբերությունները վատթարացնելու համար։ Ընդհակառակը՝ մենք արել և շարունակում ենք անել ամեն ինչ նորմալ, բարիդրացիական, բարեկամական հարաբերությունները պահպանելու համար»,- ասել է Ռուբինյանը։
Նա նաև քննադատել է հայկական բիզնեսների նկատմամբ Ռուսաստանի սահմանած սահմանափակումները՝ նշելով, որ դրանք չեն համապատասխանում ո՛չ հայ-ռուսական հարաբերությունների ոգուն, ո՛չ ԵԱՏՄ կանոններին։
Անդրադառնալով ԵՄ անդամակցության հեռանկարին՝ Ռուբինյանը նշել է, որ հանրաքվե հնարավոր կլինի անցկացնել այն բանից հետո, երբ Հայաստանը պաշտոնապես անդամակցության հայտ ներկայացնի ԵՄ-ին, ստանա դրական պատասխան և հստակություն լինի հետագա քայլերի ու ժամկետների վերաբերյալ։
Նշենք, որ ՌԴ Պետդումայի նախագահ Վյաչեսլավ Վոլոդինը Հայաստանին կոչ է արել «կեղծավոր քաղաքականություն» չվարել և հստակ կողմնորոշվել Եվրամիության և Եվրասիական տնտեսական միության (ԵԱՏՄ) միջև։
Հետևեք մեզ տելեգրամում
