«Սիրիայի դեմոկրատական ուժերը հայտարարել են» լուծարման և սիրիական բանակում ներառվելու մասին

Քրդերի գլխավորած «Սիրիայի դեմոկրատական ուժերը» (SDF) հայտարարել են որպես առանձին զինված կառույց լուծարվելու մասին՝ իր ստորաբաժանումները սիրիական բանակի կազմում ընդգրկելու գործընթացի ավարտից հետո։

SDF-ի հրամանատար Մազլում Աբդին Դամասկոսում հեռուստաուղերձի ժամանակ հայտարարել է. «Այս որոշումն ընդունվել է այն բանից հետո, երբ ավարտվել է մեր ստորաբաժանումները սիրիական բանակի բրիգադների կազմում ընդգրկելու գործընթացը»։

Նրա խոսքով՝ «հանգամանքներն այսօր փոխվել են, և երկիրը թևակոխել է նոր փուլ, որը բնութագրվում է խաղաղությամբ և մասնակցությամբ»։

SDF-ը ստեղծվել է 2015 թվականին՝ ԱՄՆ-ի աջակցությամբ, և դարձել «Իսլամական պետության» դեմ պայքարում Վաշինգտոնի հիմնական գործընկերներից մեկը Սիրիայում։ Թուրքիան կառույցի առանցքը կազմող YPG-ն համարում է Քրդստանի աշխատավորական կուսակցության (PKK) սիրիական ճյուղ։

Դամասկոսի և SDF-ի միջև ձեռք բերված պայմանավորվածության համաձայն՝ Սիրիայի հյուսիս-արևելքում գործող ռազմական, անվտանգության և քաղաքացիական կառույցները պետք է ինտեգրվեն պետական համակարգին, իսկ SDF-ի մարտիկները՝ երկրի զինված ուժերին և անվտանգության կառույցներին։