Սեպտեմբերի 28-ին նավթի գներն աճել են ավելի քան 1 տոկոսով։ «Brent» տեսակի նավթի գինը բարձրացել է 1,27 տոկոսով՝ հասնելով մեկ բարելի դիմաց 105,64 դոլարի, իսկ ամերիկյան «WTI»-ի գինը՝ 0,76 տոկոսով՝ հասնելով 93,11 դոլարի։ Այս մասին հայտնում է «Reuters»-ը։
Շուկայի վրա ազդող հիմնական գործոններից մեկը շարունակում է մնալ ԱՄՆ-ի և Իրանի միջև բանակցությունների շուրջ անորոշությունը։ ԱՄՆ նախագահ Դոնալդ Թրամփը հայտարարել է, որ ակնկալում է այս շաբաթ շարունակել երկու երկրների ներկայացուցիչների միջև բանակցությունները, թեև նախօրեին նա հայտնել էր, որ մերժել է Իրանի ներկայացրած խաղաղության առաջարկը: Թեհրանն իր առաջարկները Վաշինգտոնին էր փոխանցել նախորդ շաբաթ՝ Կատարի միջնորդությամբ:
Բանակցությունների շուրջ անորոշությանը զուգահեռ՝ Մերձավոր Արևելքից նավթի արտահանման ծավալները սեպտեմբերին աճել են՝ հասնելով օրական 12,8 միլիոն բարելի։ Նավթի և այլ էներգակիրների շուկաների վերաբերյալ տվյալներ և վերլուծություններ տրամադրող «Kpler» ընկերության նախնական տվյալներով՝ այս ամիս Հորմուզի նեղուցով նավթի փոխադրումների ծավալը կարող է հասնել օրական մոտ 7,4 միլիոն բարելի։
Նշվում է, որ Մերձավոր Արևելքից արտահանման աճը հիմնականում պայմանավորված է Սաուդյան Արաբիայի և Արաբական Միացյալ Էմիրությունների կողմից նավթի արտահանման ծավալների ավելացմամբ։
Հետևեք մեզ տելեգրամում
