ՀՀ ԱԳՄԱ նախարար Արարատ Միրզոյանը հայտարարել է, որ Հայաստանի եվրոպական ձգտումներն ստացել են իրավական և քաղաքական ձևակերպում։ Այս մասին նա ասել է Վարշավայի անվտանգության ֆորումի շրջանակում անցկացված՝ «ԵՄ Արևելյան գործընկերության վերաիմաստավորումը» խորագրով քննարկման ժամանակ։ Ելույթը ներկայացրել է «Արմենպրես»-ը։
Միրզոյանի խոսքով՝ Արևելյան գործընկերությունը պետք է հարմարվի աշխարհաքաղաքական փոփոխություններին և հաշվի առնի մասնակից երկրների տարբեր ձգտումներն ու եվրոպական ինտեգրման ուղիները։ Նա կարևորել է ժողովրդավարության, իրավունքի գերակայության և պետական ինստիտուտների դիմակայունության ամրապնդումը։
Նախարարը նշել է, որ Հայաստան-ԵՄ հարաբերությունները զարգացել են Համապարփակ և ընդլայնված գործընկերության համաձայնագրի իրականացման և 2025 թվականի դեկտեմբերին ընդունված գործընկերության ռազմավարական օրակարգի շրջանակում։ Նա նաև հիշեցրել է, որ 2025 թվականի մարտին Հայաստանն ընդունել է ԵՄ-ին անդամակցելու գործընթացի մեկնարկի մասին օրենքը։
Անդրադառնալով տարածաշրջանային զարգացումներին՝ Միրզոյանը նշել է, որ TRIPP նախաձեռնությունը և Հայաստանի «Խաղաղության խաչմերուկ» նախագիծը կարող են նպաստել տարածաշրջանի տնտեսական, տրանսպորտային և էներգետիկ կապերի զարգացմանը։
Նրա խոսքով՝ Արևելյան գործընկերությունը պետք է վերածվի ավելի ճկուն հարթակի, որը կկարողանա հաշվի առնել գործընկեր երկրների տարբեր առաջնահերթությունները՝ պահպանելով ժողովրդավարության, համագործակցության և փոխկապակցվածության սկզբունքները։
Հետևեք մեզ տելեգրամում
