ԱՄՆ նախագահ Դոնալդ Թրամփը հայտարարել է, որ Ուկրաինայում վերականգնվել է ամերիկյան Starshield կապի համակարգի աշխատանքը։ Region Monitor-ի հաղորդմամբ՝ Թրամփը լրագրողների հետ զրույցում, անդրադառնալով Wall Street Journal-ի հրապարակմանը, ըստ որի՝ ինքը դիմել էր SpaceX-ի ղեկավար Իլոն Մասկին՝ Ուկրաինայում Starshield-ի ծառայությունը վերականգնելու համար, ասել է, որ չի ցանկանում մեկնաբանել՝ ինքն է զանգահարել Մասկին, թե մեկ ուրիշը։
«Կարծում եմ՝ վերջնական արդյունքն այն է, որ նա այն վերականգնեց»,- ասել է Թրամփը։ Ուկրաինական կողմը դեռևս չի հաստատել, որ Starshield-ի աշխատանքի սահմանափակումները վերացվել են։
Wall Street Journal-ը ավելի վաղ հայտնել էր, որ Մասկը սահմանափակել էր ուկրաինական սարքերի՝ արբանյակային ցանցին միանալու արագությունը։ Պարբերականի տվյալներով՝ դրա հետևանքով ուկրաինական որոշ ԱԹՍ-ների աշխատանքը խափանվել էր:
Մասկը, անդրադառնալով հրապարակմանը, հայտարարել էր, որ Starshield-ի աշխատանքի արագության կամ օգտագործման ցանկացած սահմանափակում որոշվում է ԱՄՆ զինված ուժերի կողմից և, ի վերջո, նախագահի կողմից։ Միևնույն ժամանակ, Թրամփը և ԱՄՆ պաշտպանության այն ժամանակվա նախարար Փիթ Հեգսեթը հայտարարել էին, որ Պենտագոնը Starshield-ի աշխատանքի փոփոխություն չի հրահանգել։
Նշենք, որ Starshield-ը SpaceX ընկերության Starlink արբանյակային կապի համակարգի ռազմական նշանակության տարբերակն է և կարևոր դեր ունի Ուկրաինայի պաշտպանության համակարգում։
Հետևեք մեզ տելեգրամում
