Հունիսի 6-ին Բեռլինում զինված հարձակման է ենթարկվել Գերմանիայի խորհրդարանի աշխատակազմի սիրիահայ աշխատակից Գևորգ Ալմասյանը։ Այս մասին տեղեկացրել է Բունդեսթագի պատգամավոր Մարկուս Ֆրոնմայերը, ում գրասենյակում աշխատում է Ալմասյանը։ Գերմանացի պատգամավորը խնդրել է օգնել իրավապահներին օգնել հետախուզման մեջ գտնվող 2 իսլամիստներին։
Հաղորդվում է, որ հարձակվողները դանակով վիրավորել են Բունդեսթագի հայ աշխատակցին, որը, սակայն, կարողացել է փախչել նրանց ձեռքից։
Ալմասյանը, ով փախստականի կարգավիճակ է ստացել Գերմանիայում, 2018 թվականից աշխատում է «Գերմանիայի համար այլընտրանք» կուսակցության պատգամավոր Մարկուս Ֆրոնմայերի մոտ։
Միջադեպի մասին գրառում է կատարել նաև Ալմասյանը՝ հրապարակելով իսլամիստներից մեկի լուսանկարը։ Ավելի ուշ նա հեռացրել է հանցագործի նկարը՝ տեղեկացնելով, որ Բեռլինի իրավապահ մարմինները զբաղվում են գործով։ Գևորգը նաև հույս է հայտնել, որ ոստիկանությունը շուտով կհայտնաբերի հանցագործին։
Նշվում է, որ Ալմասյանն ավելի վաղ սպառնալիքներ էր ստացել անհայտ անձանց կողմից, որոնք ըստ ենթադրությունների՝ իսլամական ծայրահեղականներ են եղել։
Հետևեք մեզ տելեգրամում
