Հուլիսի 19-ին Սիրիայի խորհրդարանում տեղի ունեցող խորհրդարանական ընտրություններին մասնակցող հայազգի թեկնածու Նորա Արիսյանի խոսքով՝ այս անգամ ընտրապայքարը փոքր-ինչ այլ կերպով է ընթանում՝ պայմանավորված նոր կորոնավիրուսի տարածմամբ:
Նա առաջադրվել է Դամասկոսի շրջանից, ընտրապայքարին մասնակցում է «Շամի դրոշը» անվանումն ունեցող եռանդամ խմբով:
«Մենք անկուսակցական ենք: Մոտավորապես 1800 թեկնածու կա: Դամասկոսը տասներեք աթոռ ունի խորհրդարանում»,- ասաց նա:
Նորա Արիսյանը մատնանշեց՝ ինքը գործող խորհրդարանում Արտաքին հարաբերությունների և Մարդու իրավունքների հանձնաժողովների անդամ է, այս ընթացքում փորձել է արդյունավետ աշխատել:
«Կարծում եմ՝ լավ դերակատարում եմ ունեցել արտաքին հարաբերությունների հանձնաժողովում: Միշտ մասնակցել եմ Սիրիա ժամանած բոլոր երկրների խորհրդարանական խմբերի ընդունելություններին, ժողովներին, ներկայացրել եմ Սիրիայի դիրքորոշումը, երկրի վիճակը: Ինձ նաև բազմիցս հարցեր են ուղղել Սիրիայում քրիստոնյաների վիճակի մասին»,- ասաց նա:
Հիմա, ըստ հայազգի թեկնածուի, Սիրիայում խորհրդարանական ընտրելիս Սիրիայում հաշվի են առնելու, թե պատերազմից հետո երկրում ստեղծված տնտեսական խնդիրները լուծելու ինչ ծրագրերով են քաղաքական ուժերը հանդես գալու:
«Առաջնահերթություն են տնտեսական խնդիրների լուծումը և Սիրիայի վերականգնումը: Սրանք այն հարցերն են, որոնք լուծելու վրա պետք է աշխատի հաջորդ խորհրդարանը»,- ասաց նա:
Նորա Արիսյանն էլ, իր խոսքով, անձամբ աշխատելու է երկրի կյանքում մշակութային կյանքի վերականգնման վրա: «Ես տիրապետում եմ այս ոլորտին: Նաև տիրապետում եմ և աշխատանք եմ տանելու երկրի կրթական ոլորտի բարելավման ուղղությամբ»,- ասաց նա:
Նրա խոսքով՝ 2020 թ. ձևավորվող խորհրդարանը պետք է որ տարբերվի նախորդից՝ 2016թ. ձևավորվածից: «Այն ժամանակ հաշվի առնվեցին պատերազմի հետևանքները: Մեր մեջ կային նահատակների կանայք, զավակներ, քույրեր, նույնիսկ պատերազմի վիրավորներ կային: Այս խավերը հաշվի էին առնվել, քանի որ առաջին խորհրդարանն էր, որ ձևավորվում էր պատերազմը սկսելուց հետո: Հիմա էլ, կարծում եմ, որ այս ձևաչափը հաշվի կառնվի, բայց շեշտը կդրվի ավելի երիտասարդների և կանանց վրա»,- ասաց նա:
Լինելով Սիրիա-Հայաստան խորհրդարանական բարեկամական հանձնաժողովի նախագահ՝ Նորա Արիսյանը նշեց, որ եթե այս անգամ էլ անցնի խորհրդարան՝ շարունակելու է աշխատել երկու երկրների հարաբերությունների խորացման ուղղությամբ:
«Շնորհակալ եմ Հայաստանի պատգամավորներին և հատկապես Հայաստան-Սիրիա բարեկամական խմբի պատգամավորներին, որոնք ջանք չխնայեցին հարաբերությունները զարգացնելու հարցում: Մենք էլ ճիգ չխնայեցինք դրանք վերաաշխուժացնելու, ավելի խորացնելու ուղղությամբ: Տա Աստված, որ այս հարաբերություններն ավելի ամրապնդվեն ի շահ երկու երկրների և ժողովուրդների»,- ասաց նա:
Սիրիայում խորհրդարանական ընտրությունները նախատեսված էր ապրիլի 13-ին, սակայն կորոնավիրուսային համավարակի պատճառով հետաձգվեցին և նշանակվեցին հուլիսի 19-ին։
Հետևեք մեզ տելեգրամում
