Կարմիր խաչի միջազգային կազմակերպությունը սկսել է երկխոսությունն օգոստոսի 22-ին Ադրբեջանում գերեվարված հայ սպա Գուրգեն Ալավերդյանի գործով: Կազմակերպությունն արդեն երկխոսության մեջ է Հայաստանի և Ադրբեջանի իշխանությունների հետ։ Այս մասին հայտնել է կոմիտեի հայաստանյան գրասենյակի ներկայացուցիչ Զառա Ամատունին։
Նա նաև նշել է, որ Կարմիր խաչն այցելել է մեկ ամիս առաջ գերեվարված հայ մեկ այլ գերու՝ Նարեկ Սարդարյանին։ Ամատունու խոսքով՝ իրենք իրավունք չունեն հանրայնացնել, թե ինչ վիճակում է Սարդարյանը և ինչ պայմաններում է պահվում։
Հիշեցնենք, որ օգոստոսի 22-ին Գուրգեն Ալավերդյանը եղանակային խիստ անբարենպաստ պայմանների պատճառով մոլորվել էր՝ հայտնվելով Ադրբեջանի տարածքում: Ադրբեջանական կողմը հայտարարել էր, թե հայ սպան գերի է ընկել ձախողված դիվերսիայի արդյունքում։ Հայաստանի ՊՆ-ն հերքել էր դիվերսիայի մասին տեղեկությունը։
Իսկ Ներքին Խնձորեսկ գյուղի բնակիչ, անասնապահ Նարեկ Սարդարյանը հուլիսի 8-ից որոնվում էր որպես անհայտ կորած․ գնացել էր անասունների հոտի ուղությամբ և չէր վերադարձել: Հուլիսի 15-ին հայտնի էր դարձել, որ նա գտնվում է Ադրբեջանում։ Ադրբեջանը նրան ներկայացրել էր որպես ինքնակամ հանձնվածի։
Հետևեք մեզ տելեգրամում
