Լիբանանի նորանշանակ վարչապետ Մուստաֆա Ադիբը սկսել է կառավարություն ձևավորելու շուրջ բանակցությունները: Ակնկալվում է, որ կառավարությունը ձևավորվելու է երկու շաբաթվա ընթացքում: Նախատեսված է Ադիբի հանդիպումները խորհրդարանի խոսնակի, նախկին վարչապետների և խորհրդարանական բլոկի ներկայացուցիչների հետ:
Մուստաֆա Ադիբը Լիբանանի վարչապետ է նշանակվել օգոստոսի 31-ին: Նախորդ կառավարությունը՝ վարչապետ Հասան Դիաբի գլխավորությամբ, հրաժարական էր տվել օգոստոսի 4-ին Բեյրութի նավահանգստում տեղի ունեցած հուժկու պայթյունի պատճառով:
Նշենք, որ արդեն մեկ տարի է, ինչ Լիբանանում շարունակվում են կառավարության դեմ ցույցերը: Լիբանանցիները բողոքում են համատարած կոռուպցիայի, գնաճի, տնտեսական վատ վիճակի դեմ: Կառավարության ձևավորումը սովորաբար բարդ գործընթաց է բազմադավան Լիբանանում, որտեղ իշխանությունը բաժանվում է տարբեր դավանական խմբերի միջև, թեև նախագահ Միշել Աունն օրեր առաջ հայտարարել էր, որ եկել է այդ համակարգին վերջ դնելու ժամանակը:
Հետևեք մեզ տելեգրամում
