Լիբանանի հայ պատգամավորական բլոկի ներկայացուցիչներ, պատգամավորներ Հակոբ Բագրատունին, Հակոբ Թերզյանը և Ալեքսանդր Մաթոսյանը հանդիպել են Լիբանանի նորանշանակ վարչապետ Մուստաֆա Ադիբին:
Հանդիպման ավարտից հետո ՀՅԴ Լիբանանի կենտրոնական կոմիտեի ներկայացուցիչ Հակոբ Բագրատունին հայտնել է, որ վարչապետի հետ խորհրդակցություններն արդյունավետ էին, քննարկել են կարճ ժամկետում կառավարություն ձևավորելու հարցը:
Բագրատունին շեշտել է, որ իրենք կոչ են արել փրկության կառավարություն ձևավորել, որը կլինի ներդաշնակ, կունենա ընդունակ նախարարներ և կստանձնի պատասխանատվություն:
«Վարչապետն ինքն է հստակեցնելու կառավարության տեսակը, և եթե քաղաքական մասնակցության կարիք լինի, ապա այդ ձևով կմասնակցնենք, եթե ոչ քաղաքական մասնակցություն է, ապա ունենք և՛ կին, և տղամարդ անհատներ, որոնք կարող են պաշտոններ ստանձնել»,-նշել է Բագրատունին՝ շեշտելով, որ պետք է շրջանառությունից հանել կառավարության 3-4 ամիս կյանք ունենալու մասին լուրերը, որովհետև կառավարությունը ժողովրդի վստահությանն է արժանանում խորհրդարանի միջոցով:
Հիշեցնենք, որ Մուստաֆա Ադիբը Լիբանանի վարչապետ է նշանակվել օգոստոսի 31-ին: Նախորդ կառավարությունը՝ վարչապետ Հասան Դիաբի գլխավորությամբ, հրաժարական էր տվել օգոստոսի 4-ին Բեյրութի նավահանգստում տեղի ունեցած հուժկու պայթյունի պատճառով: Ադիբը խոստացել է նոր կառավարություն կազմել 2 շաբաթվա ընթացքում:
Հետևեք մեզ տելեգրամում
