Լիբանանում Հայաստանի Հանրապետության դեսպան Վահագն Աթաբեկյանի հրավերով Լիբանանում գործող հայկական օրաթերթերի և ռադիոկայանների ներկայացուցիչները դեսպանությունում հանդիպում են ունեցել «Հայաստան» համահայկական հիմնադրամի գործադիր տնօրեն Հայկակ Արշամյանի հետ: Հանդիպման ներկա էր «Հայաստան» համահայկական հիմնադրամի Լիբանանի հանձնախմբի ատենապետ Գրիգոր Թերզյանը, հանձնախմբի անդամ Լորիկ Ծատուրյան և դեսպանության քարտուղար Դավիթ Ալավերդյանը:
Հանդիպումն առիթ էր իրազեկելու հիմնադրամի գործունեության, հատկապես ճգնաժամի մեջ հայտնված համայնքներում կատարվող աջակցությունների մասին:
Կարևորելով մամուլի դերը մեր հանրային կյանքում և Հայրենիք-Սփյուռք համագործակցության համար կամուրջներ հաստատելը՝ հիմնադրամի տնօրինությունը ընդհանուր 13.000 դոլար է հատկացնելու օրաթերթերին և ռադիոկայաններին՝ գնահատելով նրանց առաքելությունը հատկապես հայատառ և հայալեզու նյութեր հրապարակելու և տարածելու գործում:
Մամուլի ներկայացուցիչները շնորհակալություն են հայտնել «Հայաստան» համահայկական հիմնադրամի տնօրենին` ներկա դժվար իրավիճակին Լիբանանի հայկական մամուլին աջակցելու համար:
Հետևեք մեզ տելեգրամում
