Ռուսաստանը կողմ է Ղարաբաղյան հակամարտության կարգավորման շրջանակներում Հայաստանի և Ադրբեջանի միջև հումանիտար քայլերի և ժողովուրդներին խաղաղության նախապատրաստելու նախաձեռնության շարունակականությանը։ Այս մասին ամենօրյա ճեպազրույցի ժամանակ հայտարարել է ՌԴ արտգործնախարարության մամուլի խոսնակ Մարիա Զախարովան՝ անդրադառնալով նոյեմբերի 17-21-ին Հայաստանի և Ադրբեջանի միջև կայացած լրագրողների փոխադարձ այցերին։
«Ռուսաստանի արտգործնախարար Սերգեյ Լավրովի նախաձեռնությամբ սույն թվականի ապրիլին Ղարաբաղյան հակամարտության կարգավորման հարցով Մոսկվայում կայացած հանդիպման ժամանակ Հայաստանի և Ադրբեջանի արտգործնախարարները համաձայնել են մի շարք հումանիտար հարցերում գործնական աշխատանքներ սկսել, այդ թվում՝ կազմակերպել մամուլի ներկայացուցիչների փոխադարձ այցեր», – նշել է Զախարովան։
Նրա խոսքով՝ այցի մանրամասները քննարկվել են մարտին Վիեննայում կայացած վերջին բարձրաստիճան հանդիպման ժամանակ։ «Մենք այդ համատեղ միջոցառումը դիտարկում ենք որպես կողմերի՝ հայերի ու ադրբեջանցիների միջև կոնտակտներ ձևավորելու մտադրության արտահայտություն։ Մենք կարծում ենք, որ ժողովուրդներին խաղաղության նախապատրաստելուն ուղղված նմանատիպ հումանիտար միջոցառումները արժե շարունակել և մենք, անկասկած, կաջակցենք դրան։ Հնարավոր ուղղություններից մեկը կարող է լինել կողմերի տարածքում ազատազրկված անձանց ճակատագրի թեթևացումը, ինչ մասին ասվել է նախարարների և ԵԱՀԿ Մինսկի խմբի համանախագահների մոսկովյան հանդիպմանը հետևած հայտարարության մեջ», – ասել է Զախարովան։
Հետևեք մեզ տելեգրամում
