Դեկտեմբերի 6-7-ին Երևանում՝ «Կոնգրես» հյուրանոցի մեծ դահլիճում, տեղի կունենա «Կովկաս-Կասպյան տարածաշրջանի տեղաբնիկ ժողովուրդները գիտական իրակույթների և զեղծարարությունների լույսի ներքո» խորագրով գիտաժողով: Այս մասին մամուլի հաղորդագրություն է տարածել Երևանի պետական համալսարանի Իրանագիտության ամբիոնի վարիչ Վարդան Ոսկանյանը:
Նշվում է, որ գիտաժողովը կազմակերպվել է ԵՊՀ Արևելագիտության ֆակուլտետի Իրանագիտության ամբիոնի և ՀՀ ԳԱԱ Արևելագիտության ինստիտուտի Քրիստոնյա Արևելքի բաժնի կողմից։
Հայաստանցի գիտնականներից բացի, գիտաժողովին մասնակցելու են մոտ 20 օտարերկրյա մասնագետներ և հասարակական գործիչներ, այդ թվում Կովկաս-Կասպյան տարածաշրջանի տեղաբնիկ ժողովուրդներից թալիշների, լեզգիների, ավարների, օսերի և այլոց ներկայացուցիչներ:
Գիտաժողովի բացմանը ողջույնի խոսքով են հանդես գալու ԵՊՀ իրանագիտության ամբիոնի վարիչ Վ. Ոսկանյանը, ԵՊՀ Արևելագիտության ֆակուլտետի դեկան Ռ. Մելքոնյանը, ՀՀ ԳԱԱ Արևելագիտության ինստիտուտի տնօրեն Ռ. Սաֆրաստյանը, Ազգամիջյան հարաբերությունների հարցերով ՌԴ նախագահին կից փորձագիտական խորհրդի անդամ, ՌԴ «Թալիշական սփյուռքի» ղեկավար Ի. Շաբանովը, հայտնի գիտնականներ Վ. Զախարովը, Ա. Ալիքբերովը, Վ. Բեսոլովը, Մ․ Ջաֆարի-Դեհաղին և այլք։
Իրանագետ Ոսկանյանի տեղեկացմամբ` գիտաժողովին քննարկվելու են տարածաշրջանի տեղաբնիկ ժողովուրդների՝ թալիշների, թաթերի, լեզգիների, ավարների, ռուտուլների, ուտիների, ծախուրների, ինգիլոյների և այլոց ինքնությանը, պատմությանը, լեզվին, կրոնին, մշակույթին, ազգագրությանը, հնագիտությանը և քաղաքական արդի իրավիճակին վերաբերող ակադեմիական խնդիրներ և հիմնահարցեր, որոնք հատկապես կարևորվում են Ադրբեջանական Հանրապետությունում այդ ժողովուրդների մի մասի հանդեպ իրականացվող բռնաճնշումների և ձուլման քաղաքականության, ինչպես նաև հակագիտական զեղծարարությունների համատեքստում:
Հետևեք մեզ տելեգրամում
