ՄԱԿ-ի համալիր առաքելությունը պատրաստվում է մեկնել Լեռնային Ղարաբաղ՝ տարածաշրջանում հումանիտար իրավիճակը գնահատելու համար՝ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Տարածաշրջանում գործում է Կարմիր խաչի միջազգային կոմիտեն, մեկնելու է պատրաստվում Միավորված ազգերի կազմակերպության գծով համալիր գնահատման առաքելությունը», – նշել է Զախարովան։
Նրա խոսքով՝ ռուսական կողմը սերտ կապի մեջ է հումանիտար հարցերի լուծման գծով հայկական եւ ադրբեջանական համապատասխան կառույցների հետ, ինչպես նաեւ աշխատում է շահագրգիռ միջազգային կառույցների հետ: Մարդասիրական արձագանքման միջգերատեսչական կենտրոնը մեծացնում է փախստականներին աջակցության ակտիվությունը, որոնք վերադառնում են Լեռնային Ղարաբաղում նախկին բնակության վայրեր: «Նոյեմբերի 14-ից վերադարձածների թիվը մոտենում է 30 հազարի։ Օրական տեղափոխվում է 1-2 հազար մարդ։ Սկսվել են հումանիտար բեռների առաքման միջոցառումները», – ընդգծել է ՌԴ ԱԳՆ պաշտոնական ներկայացուցիչը։
Բացի այդ, դիվանագետը հայտնել է, որ ռուսական խաղաղապահ առաքելության վերահսկողության տակ է գտնվում կորած զինծառայողների եւ զոհվածների մարմինների որոնումը: Նա նշել է, որ այդ թեման «շատ զգայուն է հայկական եւ ադրբեջանական հասարակություններում»: «Մեր խաղաղապահները որոնումն իրականացնում են ժամանակակից տեխնիկական միջոցների օգտագործմամբ», – հավելել է նա:
Հետևեք մեզ տելեգրամում
