Եվրոպական Միության արտաքին հարաբերությունների գծով բարձրագույն հանձնակատար Ժոզեպ Բորելը Բրյուսելում կայացած ԵՄ-Հայաստան գործընկերության խորհրդի նիստին հասնելուն պես հայտարարել է, որ փորձել է ԱԳ նախարարների մասնակցությամբ կազմակերպել եռակողմ՝ ԵՄ-Հայաստան-Ադրբեջան հանդիպում, սակայն դա անհնար է եղել:
«Քանի որ ինձ հետ շփվել են երկու նախարարներն էլ, մենք փորձեցինք եռակողմ կապ հաստատել՝ Եվրոպական Միություն, Հայաստան և Ադրբեջան: Դա անհնար էր, այդ պատճառով երկու նախարարների հետ կհանդիպեմ առանձին»,-ասել է Բորելը:
Նրա խոսքով, Ռուսաստանի օգնությամբ Լեռնային Ղարաբաղում ձեռք բերված հրադադարի վերաբերյալ համաձայնությունը կանխել է մարդկային հետագա զոհերը, սակայն այդ հրադադարին պետք է հետևել:
Բորելը նաև հավելել է, որ եթե ԵՄ-ն կարողանա իր դերը խաղա հրադադարի պահպանման, խաղաղության վերականգնման և ամրապնդման հարցում՝ լրացնելով ԵԱՀԿ ՄԽ ջանքերը, ապա պատրաստ է դրան:
Հետևեք մեզ տելեգրամում
