Ինքնահռչակ Հյուսիսային Կիպրոսի թուրքական հանրապետության ղեկավարությունը Գեչիթքալե կոչվող օդանավակայանը թուրքական ԶՈւ-ի տրամադրության տակ դնելու որոշում էր ընդունել: Որոշումից հետո նշյալ օդանավակայանում բազմանպատակ անօդաչու թռչող սարքերի (ԱԹՍ) օգտագործմամբ ավիաբազա հիմնելուն ուղղված Անկարայի աշխատանքների շրջանակներում առաջին Bayraktar TB2 տիպի անօդաչուն վայրէջք է կատարել նշյալ օդանավակայանում:
Հաղորդվում է, որ Bayraktar TB2-ը օդ է բարձրացել Թուրքիայի հարավ արևմուտքում տեղակայված ռազմածովային ուժերի Դամալան կոչվող բազայից և 5 ժամ տևած թռիչքից հետո դեկտեմբերի 16-ին առավոտյան ժամը 10:07-ին հասել Կիպրոսի չճանաչված թուրքական հանրապետության Գեչիթքալե օդանավակայան:
Թուրքական աղբյուրի հաղորդմամբ՝ Կիպրոսի թուրքական մասի ղեկավարությունը Գեչիթքալեի օդանավակայանը Թուրքիայի այսպես կոչված խաղաղապահ ուժերի հրամանատարության տակ է դրել Անկարայի պահանջով: Նշվում է, որ այս քայլը պատասխան էր Միջերկրական ծովում իրավիճակի լարման ֆոնին Իսրայելի՝ հունական կողմին (Կիպրոսի Հանրապետությանը) 8 անօդաչու տրամադրելուն, ինչպես նաև ռազմական նավերը Կիպրոսի ափեր ուղարկելու Ֆրանսիայի ու Իտալիայի որոշումներին:
Հետևեք մեզ տելեգրամում
