Թուրքիայում Հունաստանի ու Ֆրանսիայի դեսպաններին կանչել են արտգործնախարարություն, որտեղ նրանց բողոքի նոտա է հղվել: Ըստ թուրքական կողմի հայտարարության՝ պատճառն այն է, որ ապրիլի 15-ին Հունաստանի ռազմածովային ուժերին պատկանող «Elli» ռազմանավը ֆրանսիական «L’Atalante» գիտահետազոտական նավի հետ Արևելյան Միջերկրածովում սահման է խախտել և մուտք գործել Թուրքիայի մայրցամաքային ծանծաղուտ (շելֆ): Այս մասին հայտնում է Ermenihaber.am-ը:
Թուրքիայի արտգործնախարարությունում հույն և ֆրանսիացի դիվանագետներին խստորեն զգուշացրել են միջադեպի կապակցությամբ։ Նրանց հստակ փոխանցվել է, որ կրկնության դեպքում Թուրքիայի զինված ուժերը իրենց իրավունք կվերապահեն պատասխան գործողություններ իրականացնել:
Թուրքական աղբյուրի հաղորդմամբ՝ դիվանագետներին ԱԳՆ կանչելուց հետո, սակայն, այդ նավերը չեն շտապել լքել մուտք գործած գոտին: Ֆրանսիական ու հունական նավերը հեռացել են միայն այն բանից հետո, երբ մոտեցել է թուրքական ռազմանավը և զգուշացումներ հնչեցրել։
Հետևեք մեզ տելեգրամում
