Ուկրաինան կարող է ստիպված լինել կրճատել ոչ ռազմական ծախսերը, եթե չկարողանա դաշնակիցներից լրացուցիչ ֆինանսավորում ստանալ։ Այս մասին Euronews-ին հայտնել է Ուկրաինայի ֆինանսների նախարար Սերգեյ Մարչենկոն։
Նրա խոսքով՝ Ուկրաինան 2022 թվականից ի վեր բյուջետային նման բարդ իրավիճակում չէր հայտնվել։ Մարչենկոն նշել է, որ ֆինանսական միջոցների պակասի պատճառով կարող են հետաձգվել պատերազմի հետ չկապված որոշ վճարումներ։
Միաժամանակ նախարարը նշել է, որ իրավիճակը չի անդրադառնա արտաքին վարկատուների նկատմամբ Ուկրաինայի պարտավորությունների կատարմանը։ Նրա խոսքով՝ խնդիրները կարող են ավելի շատ զգացվել տեղական մակարդակում, այդ թվում՝ ապաստարանների և ենթակառուցվածքների կառուցման ոլորտում։ Մարչենկոն հայտնել է, որ հաջորդ տարվա համար ֆինանսավորման պակասը կկազմի մոտ 32,6 միլիարդ դոլար։
«Պատերազմը շատ արագ սրվել է։ Մենք դա ինքներս ենք գիտակցում։ Վերջին ամսվա համեմատ՝ իրավիճակը լիովին այլ է, հատկապես մեր լոգիստիկայի վրա վերջին հարձակումների պատճառով։ Մենք շատ ծանր ձմեռ ենք ակնկալում»,- ասել է Մարչենկոն։
Նա նաև եվրոպական երկրներին կոչ է արել նոր մոտեցումներ կիրառել Ուկրաինայի ֆինանսավորման հարցում և քննարկել սառեցված ռուսական ակտիվների օգտագործման նոր ծրագիրը։
Հետևեք մեզ տելեգրամում
