Հավաքական անվտանգության պայմանագրի կազմակերպությունը պատասխանել է ՀՀ վարչապետի պաշտոնակատար Նիկոլ Փաշինյանի՝ ԱԺ-ում հնչեցրած քննադատությանը՝ նշելով, որ դրանք ի գիտություն են ընդունվել, և խորհրդակցություն անցկացնելու աշխատանքները շարունակվում են: Այս մասին հայտնել է ՀԱՊԿ մամուլի քարտուղար Վլադիմիր Զայնետդինովը:
«ՀՀ վարչապետի պաշտոնակատար Նիկոլ Փաշինյանի տեղեկությունը ի գիտություն է ընդունվել: ՀԱՊԿ նախագահ Էմոմալի Ռահմոնիի հանձնարարությամբ աշխատանքները շարունակվում են»,-ՌԻԱ Նովոստիին ասել է Զայնետդինովը:
Հիշեցնենք, որ ՀՀ վարչապետի պաշտոնակատար Նիկոլ Փաշինյանը, մայիսի 26-ին ԱԺ-ում կառավարության անդամների հետ հարց ու պատասխանին, անդրադառնալով ԼՀԿ ղեկավար Էդմոն Մարուքյանի հարցին, հայտարարել է, որ այս պահի դրությամբ ՀԱՊԿ գործողությունների արագությունը հայկական կողմին չի բավարարում:
Ավելի վաղ, ՀԱՊԿ գլխավոր քարտուղարի տեղակալ Վալերի Սեմերիկովը նշել էր, որ վերջին օրերին հայ-ադրբեջանական սահմանին առաջացած սրացումը պահանջում է հապշտապ միջոցների ձեռնարկում՝ «առաջին հերթին, քաղաքական-դիվանագիտական բնույթի, և Հայաստանի ու Ադրբեջանի միջև պետական սահմանի սահմանազատման և սահմանագծման հարցերի լուծում»:
Հետևեք մեզ տելեգրամում
