Լիբանանի վարչապետի պաշտոնակատար Հասան Դիաբ կառավարության հարժարականից մեկ տարի անց հայտարարություն է տարածել՝ համախմբման կոչ անելով:
Դիաբը նշել է, որ թեև մեկ տարի անցել է կառավարության հրաժարականից, բայց երկիրը դեռ գտնվում է խոր ճգնաժամի մեջ, իսկ կառավարություն ձևավորելու ջանքերը դեռ արդյունք չեն տալիս:
Դիաբը կարծիքով՝ Լիբանանի միակ փրկությունը կարող է լինել Արժույթի միջազգային հիմնադրամի հետ վերսկսվելիք բանակցությունը, որը առաջընթաց էր գրանցել հենց իր ղեկավարած կառավարության ընթացքում՝ նախքան Բեյրութի նավահանգստի աղետալի պայթյունը: Սակայն պայթյունի պատճառով կառավարությունը հրաժարական տվեց, իսկ բանակցությունները դադարեցվեցին` փլուզման տանելով երկիրը, տնտեսական և հանրային դիմադրողականության բոլոր հատկանիշները:
Դիաբի խոսքերով՝ կառավարությունը, չնայած իր սահմանափակ կարողություններին և իրավասություններին, արտաքին արդյունավետ օգնության բացակայության, դեռ փորձեր է անում երկիրը դուրս բերել փակուղուց: Անդրադառնալով քննադատություններին՝ վարչապետի պաշտոնակատարը նշել է, որ անարդար է ժամանակավոր կառավարությանը պատասխանատվությունից խուսափող համարել, որովհետև բոլոր նախարարները շարունակում են գործել և գործադրել բոլոր ջանքերը դիմագրավելու իրար հաջորդող ճգնաժամերին:
Ընդգծելով, որ ժամանակավոր կառավարությունը դանդաղեցրել է երկրի ամբողջական փլուզումը, սակայն ավելին ի վիճակի չէ անել՝ նկատի ունենալով սահմանադրական, քաղաքական եւ վարչական սահմանափակումները, Դիաբը հավելել է. «Հետևաբար կոչ եմ ուղղում բոլորին, ովքեր հավատարիմ են այս երկրին, շրջանցելու իրենց շահերը և կազմելու ներկա ճգնաժամը հաղթահարելու ունակ կառավարություն, որը կփրկի ժողովուրդին տառապանքներից»:
Հետևեք մեզ տելեգրամում
