Հոկտեմբերի 11-ին Լիբանանի հարավում գտնվող Ալ-Զահրանիի նավթավերամշակման գործարանի պահեստում պայթյուն է բռնկվել: Բենզին պարունակող տանկերից մեկը սկսել է հանկարծակի այրվել: Այս մասին հաղորդում է լիբանանյան պաշտոնական NNA լրատվական գործակալությունը:
Աղբյուրի տեղեկություններով՝ պայթյունի առաջացման պատճառը դեռևս անհայտ է: Դեպքի վայր մեկնած գլխավոր դատախազ Ռահիմ Ռամադանը սկսել է հրդեհի հանգամանքների հետաքննությունը։
Ինչպես հաղորդում է աղբյուրը՝ հրդեհի հնարավոր տարածման մտավախության պատճառով հրշեջները տարհանել են մոտակայքի բնակավայրերի բնակիչներին:
Նշենք, որ հրդեհը մոտ է Լիբանանի երկու խոշորագույն էլեկտրակայաններին, որոնք հոկտեմբերի 9-ին դադարել էին գործել, և Լիբանանը 22 ժամով հոսանքազրկվել էր:
Հետևեք մեզ տելեգրամում
