Ռուսաստանից պաշտպանական սարքավորումներ գնելու պայմանագրերի իրականացումը կշարունակվի: Այս մասին հայտարարել է Իրանի զինված ուժերի շտաբի պետ, գեներալ-մայոր Մուհամմեդ Բաղերին, ով հոկտեմբերի 18-ին այցով ժամանել էր Մոսկվա, տեղեկացնում է Mehr-ը:
Նա ընդգծել է, որ Իրանին անհրաժեշտ է համապարփակ ճանապարհային քարտեզ՝ երկրների, հատկապես Ռուսաստանի եւ հարեւան այլ երկրների հետ ամուր հարաբերություններ հաստատելու համար:
«Հաշվի առնելով Ռուսաստանի հետ ռազմապաշտպանական հարթությունում համագործակցության տարբեր հնարավորությունները՝ երկու երկրների միջեւ երկկողմ հարաբերություններն ու համագործակցությունը կընդլայնվեն»,- նշել է Մուհամմեդ Բաղերին:
Խոսելով Ռուսաստանից կործանիչների, ուսումնավարժական ինքնաթիռների եւ մարտական ուղղաթիռների գնման պայմանագրերի մասին՝ Բաղերին հիշեցրել է, որ այդ պայմանագրերը կնքվել են Իրանին զենքի մատակարարումների էմբարգոյի վերացումից հետո, եւ «մենք իմ այցի ընթացքում կքննարկենք այդ պայմանագրերի կատարումը»:
Բաղերին հավելել է, որ հաշվի առնելով միջազգային իրավիճակը եւ Ռուսաստանի նախագահի հատուկ վերաբերմունքն Իրանի Իսլամական Հանրապետության հետ հարաբերությունների ամրապնդման նկատմամբ, երկրների միջեւ հարաբերությունների ընդլայնման համար մեծ հնարավորություններ են ընձեռվել:
Հետևեք մեզ տելեգրամում
