Այս շաբաթ Իսրայելն Ուվդա օդային ռազմաբազայում անցկացնում է օդային ուժերի ամենամեծ զորավարժությունները, որին մասնակցում է նաև ԱՄԷ-ն: Այս մասին գրում է Aljazeera-ն:
Աղբյուրի հաղորդմամբ՝ «Կապույտ դրոշ» անունը կրող զորավարժություններն Իսրայելն իրականացնում է դեռևս 2013 թվականից երկու տարին մեկ անգամ Նեգև անապատում՝ սինխրոնացնելու տարբեր երկրների օդային նավատորմերի տեսակները հնարավոր սպառնալիքներին դիմակայելու համար: Այս տարի իրականացվող զորավարժություններում ներգրավված են 70 կործանիչներ և 1500 զինվորականներ: ԱՄԷ-ից բացի զորավարժություններին մասնակցում են նաև Ֆրանիսան, ԱՄՆ-ն, Գերմանիան և Միացյալ Թագավորությունը:
Իսրայելի օդային ուժերի հրամանատար Ամիր Լազարը հայտարարել է, որ զորավարժությունները «ուղղված չեն Իրանի դեմ», մինչդեռ իսրայելցի պաշտոնյաները պնդում են, որ Իրանը շարունակում է մնալ Իսրայելի համար ռազմավարական առաջնային սպառնալիք և ռազմական պլանավորման կենտրոնում մեծամասամբ այդ երկիրն է:
Հիշեցնենք, որ Իսրայելը և ԱՄԷ-ն հարաբերությունները կարգավորել են «Աբրահամյան արձանագրությունների» շրջանակներում՝ 2020թ. սեպտեմբերի 15-ին Սպիտակ տանը համաձայնագիր կնքելով: Այնուհետև 2021թ. հունիսի վերջին Իսրայելի ԱԳ նախարար Յաիր Լապիդն աշխատանքային այց էր կատարել ԱՄԷ, որտեղ մասնակցել էր Աբու Դաբիում Իսրայելի դեսպանատան բացման արարողությանը:
Հետևեք մեզ տելեգրամում
