Արաբական Միացյալ Էմիրություններ կարճատև աշխատանքային այցի շրջանակում Հայաստանի նախագահ Արմեն Սարգսյանը հոկտեմբերի 27-ին հանդիպել է Աբու Դաբիի թագաժառանգ, երկրի Զինված ուժերի գերագույն հրամանատարի տեղակալ, շեյխ Մոհամմեդ բին Զայեդ Ալ Նահյանի հետ: Այս մասին տեղեկացնում է ՀՀ նախագահի աշխատակազմը:
Հանդիպման ընթացքում քննարկվել են հայ-էմիրաթական դինամիկ զարգացող հարաբերությունների խորացմանը, տարածաշրջանային և միջազգային հիմնախնդիրներին վերաբերող մի շարք հարցեր:
Հանդիպմանն անդրադարձ է եղել նաև «Էքսպո 2020 Դուբայ» ցուցահանդեսին, որը համախմբում է աշխարհի ժողովուրդների մշակույթները, նրանց պատմությունը, զարգացման ծրագրերը, ներդրումային հնարավորությունները և մասնակից երկրների կողմից կայունության ոլորտներում առաջարկվող մարդկային ու քաղաքակրթական փորձն ու գիտական նորարարությունը, գրում է Emaratalyoum լրատվական գործակալությունը:
Նշենք, որ ՀՀ նախագահ Արմեն Սարգսյանը ԱՄԷ֊ում հանդիպել է նաև Բահրեյնի թագավոր Համադ բին Իսա Ալ Խալիֆայի հետ: Քննարկվել են երկկողմ հետաքրքրություն ներկայացնող հարցեր:
Հետևեք մեզ տելեգրամում
