Իրանը երաշխիքներ է պահանջում, որ ԱՄՆ-ը այլևս դուրս չի գա միջուկային գործարքից (ԳՀՀԾ)։ Այս մասին Guardian-ի հարցազրույցում ասել է Իրանի բանակցող, քաղաքական հարցերի գծով փոխարտգործնախարար Ալի Բաղերի Քանին։
«Եթե գոյություն ունի խաղաղ համաձայնագիր երկու պետությունների միջև, այն պայմանագրի ուժ ունի։ Սա միջազգային իրավունք է։ Չի ենթադրվում, թե ԱՄՆ ներքին օրենքները կարող են առավելոթյուն ունենալ միջազգային համաձայնագրի նկատմամբ։ Դա հակասում է միջազգային իրավունքին»,- շեշտել է փոխարտգործնախարարը:
Քանիի խոսքով՝ Իրանի և ստորագրող մյուս կողմերի միջև Վիեննայի բանակցություններում չի հաջողվել հասնել համաձայնության այն պատճառով, որ ԱՄՆ-ի պատժամիջոցները գործնական ազդեցություն են թողել Իրանի հետ առևտրի վրա։ Այս համատեքստում նա նաև ավելացրել է, որ կցանկանար, որպեսզի եվրոպական տերությունները իրենց սեփական երաշխիքները տային Իրանի հետ առևտրային ծավալների մեծացման համար՝ անկախ ԱՄՆ դիրքորոշումից:
«Մենք պարզապես ասում ենք, որ ԳՀՀԾ-ի դրույթներին համապատասխան՝ պետք է հանել պատժամիջոցները։ Մենք գործարք ենք կնքել և կարծում ենք, որ այն պետք է իրագործվի»,- եզրափակել է իրանցի պաշտոնյան:
Հետևեք մեզ տելեգրամում
