Իսրայելում Ուկրաինայի դեսպան Եվգենի Կոռնիչուկը դեկտեմբերի 16-ին հայտարարել է, որ առաջիկայում իր երկիրը կարող է Երուսաղեմը ճանաչել որպես Իսրայելի «միակ մայրաքաղաք»:
Դեսպանը նաև հույս է հայտնել, որ առաջիկա տարվա ընթացքում նախագահ Վլադիմիր Զելենսկիի այցի շրջանակում Երուսաղեմում կբացվի Ուկրաինայի դեսպանատունը:
«Թույլտվություն ստանալուց հետո մենք անմիջապես կանենք դա: Պետք է սպասել պաշտոնական ճանաչման»,- ասել է Կոռնիչուկը դեսպանատան բացման վերաբերյալ:
Նրա խոսքով՝ մայրաքաղաքի ճանաչումը ամիսների հարց է, սակայն նախքան այդ գործընթացի իրականացումը Զելենսկին որոշակի նախապայմաններ ունի անվտանգության և պաշտպանության ոլորտներում երկկողմ հարաբերություններին առնչվող:
Նշենք, որ Երուսաղեմի հարցերով նախարար Զեեվ Էլկինը և նախագահ Իսահակ Հերցոգը, երբ հոկտեմբերին Կիևում մասնակցում էին Բաբի Յարի կոտորածների 80-րդ տարելիցի արարողությանը, խոսել են Զելենսկիի հետ Երուսաղեմը մայրաքաղաք ճանաչելու գործընթացի մասին: Իսկ նոյեմբերին Իսրայել էր այցելել Ուկրաինայի պաշտպանության նախարար Ալեքսեյ Ռեզնիկովն՝ Իսրայել-Ուկրաինա տնտեսական հանձնաժողովի 12-րդ հանդիպմանը մասնակցելու համար, որի ընթացքում կրկին բարձրացվել է Երուսաղեմի՝ մայրաքաղաք ճանաչելու հարցը:
Հիշեցնենք, որ 2017 թվականի դեկտեմբերի 6-ին ԱՄՆ-ը՝ նախկին նախագահ Դոնալդ Թրամփի նախաձեռնությամբ Երուսաղեմը ճանաչել է Իսրայելի մայրաքաղաք և դեսպանատունը Թել Ավիվից տեղափոխել Երուսաղեմ: Սակայն նման որոշումը խիստ քննադատությունների է արժանացել արաբական աշխարհի և այլ երկրների կողմից:
Հետևեք մեզ տելեգրամում
