Իրանի իսլամական հեղափոխության պահապանների կորպուսի հրամանատար, գեներալ-մայոր Ղասեմ Սոլեյմանիի սպանության կազմակերպման մեջ Իսրայելը նույնպես մասնակցություն է ունեցել: Այս մասին դեկտեմբերի 21-ին հայտարարել է Իսրայելի ԶՈՒ ռազմական հետախուզության նախկին ղեկավար Թամիր Հայմանը:
«Սոլեյմանիի սպանությունը կարևոր ձեռքբերում է, քանի որ մեր գլխավոր թշնամին, ինձ համար, իրանցիներն են»,- ասել է Թամիր Հայմանը Malam թերթին տված հարցազրույցում, որը հրապարակվել է Իսրայելի հետախուզության ժառանգության և հիշատակման կենտրոնում (Israeli Intelligence Heritage and Commemoration Center):
Թեև ԶԼՄ-ները ավելի վաղ տեղեկություն էին տարածել առ այն, որ Իսրայելի հետախուզական ծառայությունն է ԱՄՆ-ին տրամադրել Ղասեմ Սոլեյմանիի գտնվելու վայրը, սակայն սա առաջին անգամն է, որ բարձրաստիճան պաշտոնյան հաստատում է Իսրայելի մասնակցությունը նման գործողությունում:
Հիշեցնենք, որ 2020 թվականի հունվարի 3-ին Բաղդադում ամերիկյան ավիահարվածների արդյունքում սպանվել էր Իրանի հեղափոխության պահապանների կորպուսի «Ղոդս» ստորաբաժանման հրամանատար, գեներալ Ղասեմ Սոլեյմանին: Տեղեկությունը հաստատել էր Իրանի հեղափոխության պահապանների կորպուսը: Պենտագոնը ևս հաստատել էր, որ Սոլեյմանին սպանվել է ԱՄՆ նախագահ Դոնալդ Թրամփի հրամանով։
Հետևեք մեզ տելեգրամում
