Հունվարի 20-ին Իսրայելի արտգործնախարար Յաիր Լապիդը և Թուրքիայի ԱԳ ղեկավար Մևլութ Չավուշօղլուն հեռախոսազրույց են ունեցել: Հեռախոսազրույցը առաջինն է վերջին 13 տարիիների ընթացքում, որը հանրայնացվել է:
Լապիդի աշխատակազմի տեղեկացմամբ՝ Չավուշօղլուն զանգահարել է, որպեսզի տեղեկանա Իսրայելի արտգործնախարարի առողջական վիճակի մասին՝ COVID-19 ախտորոշումից հետո։
Ինչպես հայտնել էինք ավելի վաղ, Թուրքիայի նախագահը հայտարարել էր, թե մոտ ապագայում հնարավոր է Իսրայելի նախագահ Իսաակ Հերցոգը այցելի Թուրքիա: Իսրայելական կողմը իր հերթին հաստատել էր, որ կողմերի միջև բանակցություններ են ընթանում Հերցոգի հնարավոր այցի կազմակերպման հետ կապված, սակայն դեռ «հստակ որոշում չկա, որ այցը կկայանա»:
Նշենք, որ երկու երկրների միջև հարաբերությունները շարունակում են լարված մնալ շուրջ մեկ տասնամյակ:
Երկրները հետ կանչեցին իրենց դեսպաններին 2010 թվականին «Մավի Մարմարա» նավի միջադեպից հետո, որը մարդասիրական օգնություն էր տեղափոխում պաղեստինցիներին: Իսրայելական զորքերը հարձակվել էին նավի վրա՝ թույլ չտալով, որ այն անցնի Գազայի հատված: Նավի ուղևորները փորձել են դիմակայել իսրայելցի զինվորներին: Ի պատասխան՝ զինվորները կրակ են բացել ուղևորների ուղղությամբ, ինչի հետևանքով զոհվել է Թուրքիայի 9 քաղաքացի:
Այս միջադեպից հետո երկկողմ հարաբերությունները դանդաղորեն բարելավվում էին, բայց կրկին խզվեցին 2018-ին, երբ Միացյալ Նահանգները իր դեսպանատունը Երուսաղեմ տեղափոխեց: Այս ամենից հետ Թուրքիան ևս մեկ անգամ հետ կանչեց իր դեսպանին Իսրայելից՝ դրդելով Իսրայելին պատասխան քայլեր ձեռնարկել:
Երկկողմ հարաբերությունների բարելավման խոչընդոտներից է նաև Իսրայելի մասնակցությունը գազամուղի կառուցման աշխատանքներին, որն իսրայելական գազը պետք է հասցնեի Եվրոպա: Թուրքիան կտրականապես դեմ է եղել այս նախագծին և գազամուղի կառուցման համար առաջադրել է իր սեփական տարածքային հավակնությունները:
Հետևեք մեզ տելեգրամում
