Իրաքի խորհրդարանի խոսնակ Մուհամմադ Ալ-Հալբուսիի տան վրա հարձակում է իրականացվել: Հարձակումն իրականացվել է այն բանից հետո, երբ Իրաքի Դաշնային դատարանը հաստատեց նրա վերաընտրվելը որպես օրենսդիր մարմնի ղեակավար:
Al Arabiya-ն տեղեկացրել է, որ հարձակման հետևանքով վիրավորվել են երկու երեխաներ:
Մի բարձրաստիճան պաշտոնյա, ով ցանկացել էր մնալ անանուն, մասնամասնել է, որ հունվարի 25-ի երեկոյան «Կատյուշա» տեսակի երեք հրիթիռներ են արձակվել, որոնցից մեկը ընկել է Անբար նահանգի Կարմա թաղամասում՝ Ալ-Հալբուսիի առանձնատնից 500 մետր հեռավորությամբ գտնվող հատվածում: Պաշտոնյան պնդել է, որ հարձակման նպատակը խոսնակին թիրախավորելն է, սակայն հայտնի չէ՝ Ալ-Հալբուսին հարձակման պահին տանն է եղել, թե ոչ:
Նշենք, որ Մուհամմադ Ալ-Հալբուսին, ով ղեկավարում է «Առաջընթաց» սուննի դաշինքը, խորհրդարանում ունի 37 պատգամավորական մանդատ: Նա խորհրդարանի խոսնակ է ընտրվել հունվարի 9-ին կայացած նիստում և պաշտոնավարելու է երկրորդ անգամ:
Հատկանշական է, որ վերջին օրերի ընթացքում Բաղդադում գրանցվեցին հարձակումների մի շարք դեպքեր, որոնք ուղղված էին քաղաքական գործիչների, քաղաքացիական անձանց և կուսակցությունների շտաբների դեմ՝ օգտագործելով պայթուցիկ սարքեր և ձեռքի նռնակներ: Նախորդ շաբաթ նմանատիպ հարձակում էր իրականացվել Իրաքի փոխխոսնակ Շախուան Աբդալլահի տան վրա:
Հետևեք մեզ տելեգրամում
