Փետրվարի 3-ին Իդլիբում ԱՄՆ հատուկ ուժերի կողմից իրականացված գրոհի ժամանակ սպանվել է «Իսլամական պետություն» ահաբեկչական խմբավորման առաջնորդը, ով պայթեցրել է իրեն և իր ընտանիքի անդամներին:
«Մինչ մեր զինվորները մոտենում էին նրան ձերբակալելու, ահաբեկիչը՝ իր կատարած հանցագործությունների համար արդարադատությանն առերեսվելու փոխարեն նախընտրեց պայթեցնել իրեն և իր ընտանիքի անդամներին»,- հայտարարել է ԱՄՆ նախագահ Ջո Բայդենը Սպիտակ տնից հեռարձակվող հեռուստատեսային ելույթի ժամանակ:
Բայդենի խոսքով՝ ԱՄՆ-ը չեզոքացրել է «ահաբեկչական սպառնալիքը», իսկ Ալ-Կուրայշի սպանությունն ուղերձ է ահաբեկչական կազմակերպությունների առաջնորդներին առ այն, որ նրանք անպատիժ չեն մնա:
Իր հերթին՝ ԱՄՆ պաշտպանության նախարար Լլոյդ Օսթինը հայտարարել է, որ ԱՄՆ-ի ձեռնարկած գործողությունների հետևանքով «դաժան հարված» է հասցվել «Իսլամական պետություն» ահաբեկչական կազմակերպությանը և սպանվել է դրա առաջնորդ Աբդուլլահ Կարդաշը, ով հայտնի էր Աբու Իբրահիմ Ալ-Հաշիմի Ալ- Կուրայշ կեղծանունով:
Ամերիկացի պաշտոնյան ընդգծել է, որ, թեև ԻՊ-ն թուլացել է, ահաբեկչական կազմակերպության դեմ արշավը շարունակվելու է, քանի որ այն շարունակում է սպառնալիք հադիսանալ:
Հիշեցնենք, որ փետրվարի 3-ին ԱՄՆ-ի գլխավորած միջազգային կոալիցիան Սիրիայի հյուսիսում՝ Թուրքիայի հետ սահմանին իրականացրել է ռազմաօդային ամենամեծ գործողությունը: Ամերիկյան ԶՈՒ-ը թիրախավորել էր Սիրիայի Իդլիբ նահանգում գտնվող ԻՊ-ի առաջնորդ Ալ-Կուրայշի տունը:
Հետևեք մեզ տելեգրամում
