Սիրիայի հարցերով ՄԱԿ-ի հատուկ ներկայացուցիչ Գեյր Պեդերսոնը ակնկալում է, որ Սիրիայի սահմանադրական հանձնաժողովը շարունակելու է աշխատանքները սահմանադրական բարեփոխումների նախագիծը կազմելու համար:
Այս հայտարարությանը նախորդել էր Պեդերսոնի հանդիպումը Սիրիայի արտգործնախարար Ֆայսալ Միկդադի հետ:
Սիրիայի սահմանադրական հանձնաժողովի խորհրդակցությունների վերջին փուլը կայացել էր Ժնևում հոկտեմբերին: Սակայն հանձնաժողովի աշխատանքներն ձախողվել էին, քանի որ, ըստ Պեդերսոնի, Սիրիայի կառավարության հրաժարվել էր շարունակել սահմանադրական բարեփոխումների շուրջ բանակցությունները:
«Պետք է նշեմ, որ այսօրվա քննարկումներից հետո ես ավելի լավատես եմ, որ սահմանադրական հանձնաժողովի խորհրդակցությունների յոթերորդ փուլը մարտին հնարավոր կլինի անցկացնել»,- մանրամասնել է Պեդերսոնը:
Հատուկ ներկայացուցիչը հաստատել է, որ հանդիպումներ է ունենալու նաև կառավարության և ընդդիմության ներկայացուցիչների հետ:
Նշենք, որ Սիրիայում խաղաղության հասնելու ՄԱԿ-ի ճանապարհային քարտեզը նախատեսում էր նոր սահմանադրության մշակում: Այս նախագիծը հաստատվել էր դեռևս 2012 թվականին ՄԱԿ-ի, Արաբական պետությունների լիգայի, Եվրամիության, Թուրքիայի և ՄԱԿ-ի Անվտանգության խորհրդի բոլոր հինգ մշտական անդամների կողմից: Նախատեսվում էր, որ հանձնաժողովի աշխատանքն ավարտվելու է ՄԱԿ-ի կողմից վերահսկվող ընտրություններով, որոնց մասնակցելու իրավունք կունենան բոլոր սիրիացիները, այդ թվում՝ արտագաղթածները։
Հետևեք մեզ տելեգրամում
