Մոսկվայում հանդիպել են Ռուսաստանի և Իրանի արտգործնախարարներ Սերգեյ Լավրովն ու Ամիր Աբդոլլահիանը:
«Մենք քննարկել ենք Սիրիայում տիրող իրավիճակը և համատեղ ցանկություն ենք արտահայտել համակարգել մեր ջանքերն ու միջոցները Սիրիայում մարդասիրական և տնտեսական պայմանների բարելավման համար»,- ասել է Լավրովը Մոսկվայում Իրանի արտգործնախարարի հետ կայացած համատեղ մամուլի ասուլիսի ժամանակ:
Իր հերթին Աբդոլլահիանն ավելացրել է, որ ռուս պաշտոնակցի հետ քննարկել է սիրիական ճգնաժամի խաղաղ լուծման հնարավոր ուղիները Աստանայի ձևաչափի շրջանակներում:
Անդրադառնալով երկկողմ հարաբերություններին՝ իրանցի դիվանագետն ընդգծել է, որ այդ հարաբերությունները զարգացնելու հեռանկարները դրական են, իսկ երկու երկրների միջև տնտեսական բազում ծրագրեր կան:
Կողմերը քննարկել են նաև Իրանի միջուկային ծրագրի շուրջ բանակցություններին առնչվող հարցերը: Ամիր Աբդոլլահիանը հայտարարել է, որ ՌԴ-ն չի խոչընդոտելու Վիեննայում համաձայնության կայացմանը, և որ Ուկրաինայի իրադարձությունների ու Վիեննայի բանակցությունների միջև որևէ կապ չկա:
Նա շեշտել է, որ ինչպես բանակցությունների սկզբում, այնպես էլ հետագայում Ռուսաստանն աջակցելու է Իրանին բարենպաստ համաձայնության հասնելու համար:
Լավրովն իր հերթին հայտարարել է, որ Ռուսաստանն ԱՄՆ-ից գրավոր երաշխիքներ է ստացել առ այն, որ պատժամիջոցները չեն ազդի Իրանի հետ համագործակցության վրա: Ըստ նրա՝ այդ երաշխիքները ներառված են Միջուկային գործարքի վերականգնման մասին համաձայնության տեքստում:
Հետևեք մեզ տելեգրամում
