Լիբանանի ներքին գործերի նախարարությունը հայտնել է, որ 2022 թվականին խորհրդարանական ընտրություններին թեկնածություններ առաջադրելու պաշտոնական ժամկետն ավարտվել է:
Ընտրություններին առաջադրված թեկնածուների թիվը հասել է 1043-ի՝ այդ թվում 115 կին՝ գերազանցելով 2018 թվականի ընտրություններում թեկնածուների թվին:
Լիբանանի ներքին գործերի նախարարությունը հայտնել է, որ նախնական ցուցակներում գրանցված ընտրողների թիվը կազմում է մոտ 3,97 միլիոն, այդ թվում՝ արտասահմանում բնակվող ավելի քան 225 հազար լիբանանցիներ։
Լիբանանի ներքին գործերի նախարար Բասսամ Մաուլաուին ընդգծել է, որ խորհրդարանական ընտրությունները պետք է կայանան հստակ ժամանակին՝ ավելացնելով, որ ամբողջ երկրում կա 7000 ընտրատեղամաս: Նա նաև հավաստիացրել է, որ անելու են ամեն ինչ ընտրությունների սկզբից մինչև հաջորդ օրը արդյունքների հրապարակումը էլեկտրականություն ապահովելու համար: Նշենք, որ Լիբանանում դեռևս չի լուծվել բնակչությանը էլեկտրականությամբ ապահովելու խնդիրը: Օրեր առաջ Լիբանանի կառավարությունն ընդունել է էլեկտրաէներգիայի վնասված հատվածի բարեփոխման և վերակառուցման ծրագիրը:
Հիշեցնենք, որ խորհրդարանական ընտրությունները կայանալու են մայիսի 15-ին: Ինչպես ավելի վաղ էր հաղորդվել, խորհրդարանում ավելացվելու է ևս վեց տեղ լիբանանյան սփյուռքը ներկայացնողների համար։
Հետևեք մեզ տելեգրամում
